ഏതാനും ദിവസങ്ങൾക്കു മുൻപാണ് യുവ സൂപ്പർ താരം പൃഥ്വിരാജ് സുകുമാരൻ ലൂസിഫർ എന്ന ബ്ലോക്ക്ബസ്റ്റർ ചിത്രത്തിന് ശേഷം താൻ സംവിധാനം ചെയ്യാൻ പോകുന്ന രണ്ടാമത്തെ ചിത്രം പ്രഖ്യാപിച്ചത്. മോഹൻലാൽ തന്നെ നായകനായി എത്തുന്ന ഈ ചിത്രത്തിന്റെ പേര് ബ്രോ ഡാഡി എന്നാണ്. ഉടനെ തന്നെ ഈ ചിത്രത്തിന്റെ ഷൂട്ടിംഗ് ആരംഭിക്കും എന്നുള്ള വിവരങ്ങൾ ആണ് ലഭിക്കുന്നത്. അതോടൊപ്പം മറ്റൊരു ബിഗ് ബഡ്ജറ്റ് ചിത്രത്തിൽ അഭിനയിക്കാൻ കൂടിയുള്ള തയ്യാറെടുപ്പിൽ ആണ് പൃഥ്വിരാജ് എന്ന റിപ്പോർട്ടുകളും വരുന്നുണ്ട്. പൃഥ്വിരാജ് സുകുമാരനൊപ്പം ആസിഫ് അലിയും കേന്ദ്ര കഥാപാത്രത്തെ അവതരിപ്പിക്കുന്ന ഈ ചിത്രത്തിൽ മഞ്ജു വാര്യർ, അന്നാ ബെൻ എന്നിവരും വേഷമിടും എന്നും വാർത്തകൾ നമ്മളോട് പറയുന്നു. പ്രശസ്ത നോവലിസ്റ്റ് ഇന്ദുഗോപൻ രചിക്കുന്ന ഈ ചിത്രം സംവിധാനം ചെയ്യാൻ പോകുന്നത് പ്രശസ്ത ഛായാഗ്രാഹകനും സംവിധായകനുമായ വേണു ആയിരിക്കും.
ഈ ചിത്രത്തെ കുറിച്ചുള്ള കൂടുതൽ വിവരങ്ങൾ വൈകാതെ പുറത്തു വിടുമെന്നുള്ള സൂചനയാണ് ഇപ്പോൾ ലഭിക്കുന്നത്. അന്നാ ബെൻ ഒഴികെയുള്ള ഇതിലെ മറ്റു താരങ്ങൾ വേണു ഒരുക്കിയ മുൻ ചിത്രങ്ങളിൽ അഭിനയിച്ചിട്ടുണ്ട്. വേണു ഒരുക്കിയ ആദ്യ ചിത്രമായ ദയയിൽ മഞ്ജു വാര്യർ ആയിരുന്നു കേന്ദ്ര കഥാപാത്രത്തെ അവതരിപ്പിച്ചത്. അതുപോലെ വേണു സംവിധാനം ചെയ്ത മമ്മൂട്ടി ചിത്രമായ മുന്നറിയിപ്പിൽ പൃഥ്വിരാജ് ഒരു അതിഥി വേഷത്തിൽ എത്തി. ആണും പെണ്ണും എന്ന ആന്തോളജി ചിത്രത്തിൽ വേണു ഒരുക്കിയ ഭാഗത്തിലെ നായകനായി എത്തിയത് ആസിഫ് അലി ആയിരുന്നു. ഏതായാലും ഈ വരാൻ പോകുന്ന വേണു ചിത്രം മലയാള സിനിമയുടെ എഴുത്തുകാരുടെ സംഘടനയുടെ പിൻബലത്തിൽ ആണ് ഒരുക്കുന്നത് എന്നാണ് അറിയാൻ സാധിക്കുന്നത്.
