പ്രണവ് മോഹൻലാൽ നായകനായി അഭിനയിക്കുന്ന പുതിയ ചിത്രമാണ് ഹൃദയം. പ്രശസ്ത സംവിധായകനും നടനും ഗായകനുമായ വിനീത് ശ്രീനിവാസൻ രചിച്ചു സംവിധാനം ചെയ്യുന്ന ഈ ചിത്രത്തിന്റെ ഷൂട്ടിംഗ് ഒരിടവേളക്ക് ശേഷം ഇപ്പോൾ പുനരാരംഭിച്ചിരിക്കുകയാണ്. സംവിധായകൻ പ്രിയദർശന്റെ മകളും പ്രശസ്ത തെന്നിന്ത്യൻ നടിയുമായ കല്യാണി പ്രിയദർശൻ നായികാ വേഷം ചെയ്യുന്ന ഈ ചിത്രത്തിന്റെ ഷൂട്ടിംഗ് ബ്രേക്ക് സമയത്തു ദളപതി വിജയ് നായകനായ മാസ്റ്റർ എന്ന തമിഴ് ചിത്രം കാണാൻ പോയ വിശേഷം പങ്കു വെച്ചിരിക്കുകയാണ് സംവിധായകൻ വിനീത് ശ്രീനിവാസൻ. പ്രണവിനും കല്യാണിക്കുമൊപ്പം തീയേറ്ററിൽ നിന്നെടുത്ത സെൽഫി പങ്കു വെച്ച് കൊണ്ടാണ് മാസ്റ്റർ കാണാൻ പോയ വിശേഷം അദ്ദേഹം ഏവരെയും അറിയിച്ചത്. ചിത്രം കണ്ടു കഴിഞ്ഞു മാസ്റ്റർ ഏറെയിഷ്ടപ്പെട്ടു എന്നും പറഞ്ഞ വിനീത് ശ്രീനിവാസൻ, മാസ്റ്റർ ഒരുക്കിയ ലോകേഷ് കനകരാജിന് അഭിനന്ദനവും അറിയിച്ചു. സാധാരണ മാസ്സ് ചിത്രങ്ങളിൽ നിന്നും വ്യത്യസ്തമായാണ് മാസ്റ്റർ ഒരുക്കിയിരിക്കുന്നതെന്നും വിനീത് അഭിപ്രായപ്പെട്ടു.
ഒരുപാട് വർഷങ്ങൾക്ക് ശേഷം പ്രശസ്ത സിനിമാ നിർമ്മാണ ബാനറായ മേറിലാണ്ട് സിനിമാസ് മലയാള സിനിമയിലേക്ക് തിരിച്ചെത്തുന്നത് ഹൃദയം നിർമ്മിച്ച് കൊണ്ടാണ്. ഈ ബാനറിൽ ഹൃദയം നിർമ്മിക്കുന്നത് വൈശാഖ് സുബ്രഹ്മണ്യമാണ്. നോബിൾ ബാബു തോമസ് സഹനിർമ്മാതാവായി എത്തുന്ന ഈ ചിത്രത്തിൽ അജു വർഗീസ്, ദർശന രാജേന്ദ്രൻ എന്നിവരും പ്രധാന വേഷങ്ങൾ ചെയ്യുന്നുണ്ട്. മലർവാടി ആർട്സ് ക്ലബ്, തട്ടത്തിൻ മറയത്, തിര, ജേക്കബിന്റെ സ്വർഗ്ഗ രാജ്യം എന്നിവയാണ് വിനീത് ശ്രീനിവാസൻ ഇതിനു മുൻപ് സംവിധാനം ചെയ്ത ചിത്രങ്ങൾ. ഹിഷാം അബ്ദുൽ വഹാബ് സംഗീതമൊരുക്കുന്ന ഈ ചിത്രത്തിൽ നടൻ പൃഥ്വിരാജ് സുകുമാരൻ ഒരു ഗാനമാലപിച്ചിട്ടുണ്ട്
