മലയാള സിനിമയുടെ എക്കാലത്തെയും മികച്ച കൂട്ടുകെട്ടാണ് പ്രിയദർശൻ- മോഹൻലാൽ എന്നിവരുടേത്, എന്നാൽ ഇന്ന് രണ്ട് പേരുടെ മക്കളും സിനിമയിൽ രംഗ പ്രവേശനം നടത്തി കഴിഞ്ഞു. പ്രണവ് മോഹൻലാൽ ജീത്തു ജോസഫ് സംവിധാനം ചെയ്ത ആദിയിലൂടെ മലയാള സിനിമയിൽ വന്നപ്പോൾ കല്യാണി പ്രിയദർശൻ വിക്രം കുമാർ സംവിധാനം ചെയ്ത ‘ഹലോ’ എന്ന ചിത്രത്തിലൂടെ തെലുങ്കിലാണ് ചുവട് വെച്ചിരിക്കുന്നത്. പ്രണവ് തന്റെ രണ്ടാം ചിത്രം അരുൺ ഗോപിയുമാണ് ചെയ്യാൻ ഒരുങ്ങുന്നത് എന്നാൽ കല്യാണി തന്റെ രണ്ടാമത്തെ ചിത്രവും തെലുഗിൽ തന്നെയാണ് ചെയ്യുന്നത്. കല്യാണി പ്രിയദർശന്റെ മലയാള സിനിമക്ക് വേണ്ടിയാണ് സിനിമ പ്രേമികൾ എല്ലാവരും കാത്തിരിക്കുന്നത്.
ജിയോ ഫിലിംഫെയർ അവാർഡിൽ തെലുങ്കിലെ മികച്ച പുതുമുഖ നടിയായി കല്യാണി പ്രിയദർശനെയാണ് തിരഞ്ഞെടുത്തത്. അവാർഡ് നിശയിൽ താരം തന്റെ മലയാള ചിത്രത്തെ കുറിച്ചു സൂചിപ്പിക്കുകയുണ്ടായി. മലയാള സിനിമയിലെ ഏറ്റവും മികച്ച സംവിധായകരിൽ ഒരാളായ ഐ. വി ശശിയുടെ മകൻ അനി സംവിധാനം ചെയ്യുന്ന ആദ്യ ചിത്രത്തിലൂടെയായിരിക്കും കല്യാണി മലയത്തിലേക്ക് എത്തുക.
പ്രിയദർശന്റെ ബ്രഹ്മാണ്ഡ ചിത്രമായ ‘മരക്കാർ അറബിക്കടലിന്റെ സിംഹം’ എന്ന ചിത്രത്തിൽ പ്രിയന്റെ കൂടെ തിരക്കഥ എഴുതാൻ സഹായിയായി അനി ഉണ്ടായിരുന്നു. അനി വൈകാതെ ഒരു ചിത്രം സംവിധാനം ചെയ്യും എന്ന സൂചന ഒരു ഇന്റർവ്യൂയിൽ അദ്ദേഹം നൽകിയിരുന്നു. റിപ്പോർട്ടുകൾക്ക് അനുസരിച്ചു അടുത്ത വർഷം ഷൂട്ടിങ് ആരംഭിക്കാൻ പോകുന്ന ചിത്രത്തിൽ പ്രണവ് മോഹൻലാലായിരിക്കും നായകനായി വേഷമിടുക, അതുപോലെ നായികയായി കല്യാണിയും വേഷമിടും. ഐ. വി ശശിയുടെ മകന് എല്ലാവിധ പിന്തുണയുമായി പ്രിയദർശൻ മുന്നിൽ ഉണ്ടാവും എന്നാണ് അറിയാൻ സാധിച്ചത്.
