ജയരാജ് സംവിധാനം ചെയ്ത ഫോർ ദി പീപ്പിൾ എന്ന ചിത്രത്തിലെ സൂപ്പർ ഹിറ്റ് ഗാനങ്ങളിലൂടെ സൗത്ത് ഇന്ത്യൻ സിനിമയിൽ ഏറെ പ്രശസ്തനായ ഗായകനും സംഗീത സംവിധായകനും ആണ് ജാസി ഗിഫ്റ്റ്. ആ ചിത്രത്തിലെ ലജ്ജാവതിയെ നിന്റെ കള്ള കടക്കണ്ണിൽ എന്ന ഗാനം മലയാളക്കരയിൽ വമ്പൻ തരംഗമാണ് സൃഷ്ടിച്ചത്. ആബാലവൃദ്ധം ജനങ്ങൾ ഏറ്റു പാടിയ ആ ഗാനം സൗത്ത് ഇന്ത്യൻ സിനിമയിൽ തന്നെ വലിയ ഓളം സൃഷ്ടിച്ചു. അതിനു ശേഷം സംഗീത സംവിധായകൻ ആയും ഗായകൻ ആയും ജാസി ഗിഫ്റ്റ് നമ്മുക്ക് തന്നത് ഒട്ടേറെ സൂപ്പർ ഹിറ്റ് ഗാനങ്ങൾ. മലയാളത്തിന്റെ അതിർവരമ്പുകൾ ഭേദിച്ച് മുന്നോട്ടു പോയ ഈ പ്രതിഭ അന്യ ഭാഷ സിനിമകളിലും തന്റെ കഴിവ് തെളിയിച്ചു കൊണ്ട് അവരുടെയും പ്രീയപെട്ടവനായി മാറി. ഇപ്പോഴിതാ കണ്ണൂർ സർവ്വകലാശായിൽ നിന്ന് ഡോക്ട്ടറേറ്റ് കരസ്ഥമാക്കിയിരിക്കുകയാണ് ജാസി ഗിഫ്റ്റ്.
ഫിലോസഫിയിൽ പി എച് ഡി ചെയ്താണ് ഈ കലാകാരൻ ഡോക്ടർ ജാസി ഗിഫ്റ്റ് ആയി മാറിയത്. അദ്വൈതവും ബുദ്ധിസവുമായി ബന്ധപ്പെടുത്തി സാഹോദര്യത്തിന്റെ തത്വ ശാസ്ത്രത്തെ കുറിച്ചുള്ള പഠനത്തിനാണ് ജാസി ഗിഫ്റ്റിന് ഡോക്ട്ടറേറ്റ് നൽകിയത്. പെരുമ്പാവൂർ വല്ലതു താമസിക്കുന്ന ജെസി തിരുവനന്തപുരം സ്വദേശി ആണ്. 2003 ഇൽ റിലീസ് ആയ സഫലം എന്ന ചിത്രത്തിലൂടെ ആണ് ജാസി ഗിഫ്റ്റ് മലയാള സിനിമയിൽ അരങ്ങേറ്റം കുറിക്കുന്നത്. തമിഴ്, കന്നഡ, തെലുങ്ക് സിനിമകളിലും ജോലി ചെയ്തിട്ടുള്ള ജാസി ഗിഫ്റ്റ് ഒട്ടേറെ അവാർഡുകളും നേടിയെടുത്തിട്ടുണ്ട്. ഇപ്പോഴും സംഗീത രംഗത്ത് സജീവമായി തുടരുന്ന കലാകാരൻ ആണ് അദ്ദേഹം.
