മലയാള സിനിമയിലെ പ്രശസ്ത സംവിധായകരിലൊരാളായ വിനയൻ തന്റെ കരിയറിലെ ഏറ്റവും വലിയ ചിത്രവുമായി ഇന്ന് പ്രേക്ഷകരുടെ മുന്നിലെത്തുകയാണ്. വമ്പൻ ബഡ്ജറ്റിൽ ബ്രഹ്മാണ്ഡ ചിത്രമായി ഒരുക്കിയ പത്തൊൻപതാം നൂറ്റാണ്ടെന്ന ചരിത്ര സിനിമയാണ് വിനയൻ പ്രേക്ഷകർക്ക് സമ്മാനിക്കുന്നത്. യുവ താരം സിജു വിൽസൺ നായകനായ ഈ ചിത്രം മലയാളം കൂടാതെ തമിഴ്, തെലുങ്ക്, കന്നഡ, ഹിന്ദി ഭാഷകളിലും റിലീസ് ചെയ്യുന്നുണ്ട്. മെഗാ ബഡ്ജറ്റിലൊരുക്കിയ ഈ ചിത്രം നിർമ്മിച്ചിരിക്കുന്നത് ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനാണ്. ആക്ഷൻ രംഗങ്ങൾ കൊണ്ട് വിസ്മയം തീർക്കുന്ന ഒരു പക്കാ എന്റെർറ്റൈനെർ ആയിത്തന്നെയാണ് വിനയൻ ഈ ചിത്രമൊരുക്കിയതെന്ന സൂചനയാണ് ഇതിന്റെ ട്രൈലെർ നൽകിയത്. ഇതിലെ കേന്ദ്ര കഥാപാത്രത്തെ അവതരിപ്പിക്കാൻ സിജു വിൽസൺ നടത്തിയ മേക്ക് ഓവർ വലിയ ശ്രദ്ധ നേടിയിരുന്നു.
ശ്രീനാരായണ ഗുരുവിന് മുമ്പ് തന്നെ അവർണർക്ക് വേണ്ടി ക്ഷേത്രം സ്ഥാപിക്കുകയും മറ്റും ചെയ്തിട്ടുള്ള, പായ്ക്കപ്പലുകളും തുറമുഖവും സ്വന്തമായുണ്ടായിരുന്ന, പുഴുക്കളെ പോലെ കാണുന്ന ജനതയെ ഉയർത്തെഴുന്നേൽപ്പിക്കണമെന്ന നിലപാടിലുറച്ചു സഞ്ചരിച്ച ആറാട്ടുപുഴ വേലായുധ പണിക്കരുടെ ജീവിതമാണ് ഈ ചിത്രത്തിലൂടെ വെള്ളിത്തിരൈയിൽ എത്തുന്നത്. കേരളത്തിൽ മികച്ച റിലീസ് ലഭിച്ച ഈ ചിത്രത്തിന്റെ തിയേറ്റർ ലിസ്റ്റ് ഇവിടെ ചേർക്കുന്നു. അനൂപ് മേനോൻ, സുദേവ് നായർ, സുരേഷ് കൃഷ്ണ. ചെമ്പൻ വിനോദ്, ഇന്ദ്രൻസ്, സെന്തിൽ കൃഷ്ണ, സുധീർ കരമന, ടിനി ടോം, വിഷ്ണു വിനയ്, ദീപ്തി സതി, പൂനം ബജ്വ, നിർമ്മാതാവ് ഗോകുലം ഗോപാലൻ എന്നിവരും അഭിനയിച്ച ഈ ചിത്രത്തിന് കാമറ ചലിപ്പിച്ചത് ഷാജി കുമാർ, ഗാനങ്ങളൊരുക്കിയത് എം ജയചന്ദ്രൻ, പശ്ചാത്തല സംഗീതമൊരുക്കിയത് സന്തോഷ് നാരായണൻ എന്നിവരാണ്. വിവേക് ഹർഷനാണ് ഇതിന്റെ എഡിറ്റർ.
