ആനകളോടും ആനചിത്രങ്ങളോടും മലയാളികൾക്ക് എന്നും ഒരു പ്രത്യേക ഇഷ്ടമുണ്ട്. ഇതുവരെ പുറത്തിറങ്ങിയ ആനചിത്രങ്ങൾ ആ സ്നേഹം വ്യക്തമാക്കുന്നതാണ്. നീണ്ട ഒരു ഇടവേളയ്ക്ക് ശേഷം ഒരു ആനചിത്രം കൂടി പ്രേക്ഷകരുടെ മുന്നിലേക്ക് എത്തുകയാണ്. നവാഗതനായ ദിലീപ് മേനോന്‍ സംവിധാനം ചെയ്യുന്ന ‘ആന അലറലോടലറൽ’ എന്ന ചിത്രമാണ് ഈ ക്രിസ്‌മസിന്‌ റിലീസാകാൻ തയ്യാറെടുക്കുന്നത്.
ശേഖരൻകുട്ടി എന്ന ആനയാണ് ‘ആന അലറലോടലറലി’ലെ കേന്ദ്രകഥാപാത്രം. നന്തിലത്ത് അർജുനാണ് ശേഖരൻകുട്ടിയായി എത്തുന്നത്. ഓരോ ഷോട്ടിലും നന്തിലത്ത് അർജുൻ അഭിനേതാക്കളെ പോലും അത്ഭുതപ്പെടുത്തിയെന്ന് അണിയറപ്രവർത്തകർ മുൻപ് വ്യക്തമാക്കിയിരുന്നു. ചിത്രീകരണത്തിനിടയിൽ അര്‍ജുന്റെ ഷോട്ടുകള്‍ കാര്യമായ റീടേക്കുകളില്ലാതെയാണ് ചിത്രീകരിച്ചത്. തുമ്പിക്കൈയുടെ ചലനം, ചെവിയുടെ ഇളക്കം എന്നിങ്ങനെ ചെറിയ കാര്യങ്ങളിൽ പോലും അർജുൻ എല്ലാവരെയും അമ്പരപ്പിച്ചു.
വിനീത് ശ്രീനിവാസനും വിശാഖും ചിത്രീകരണത്തിനു മുമ്പ് തന്നെ അർജുനെ പരിചയപ്പെടാൻ എത്തിയിരുന്നു. ഈ സൗഹൃദം ചിത്രീകരണത്തിനിടയിലും ഏറെ സഹായകമായി. ഓരോ ഷോട്ടും കൃത്യതയോടെ ചിത്രീകരിക്കാന്‍ പാപ്പാനും അര്‍ജുനന് നിര്‍ദ്ദേശങ്ങള്‍ നല്‍കുകയുണ്ടായി. തുടർന്ന് എല്ലാവരെയും അമ്പരപ്പിക്കുന്ന പ്രകടനമാണ് അർജുൻ കാഴ്ചവെച്ചത്.
സിനിമാപ്രേക്ഷകർക്ക് ദൃശ്യവിരുന്നുമായി ഡിസംബർ 22 നാണ് ചിത്രം തിയറ്ററുകളിലെത്തുന്നത്. വിനീത് ശ്രീനിവാസൻ നായകനായെത്തുന്ന ചിത്രത്തിൽ അനു സിത്താരയാണ് നായിക. സുരാജ് വെഞ്ഞാറമൂട്, ഇന്നസെന്റ്, വിജയരാഘവൻ, മാമുക്കോയ, തെസ്‌നി ഖാന്‍ തുടങ്ങിയവരാണ് മറ്റ് പ്രധാനകഥാപാത്രങ്ങളെ അവതരിപ്പിക്കുന്നത്. ദീപു എസ് ഉണ്ണിയാണ് ഛായാഗ്രഹണം നിര്‍വഹിക്കുന്നത്. പോയട്രി ഫിലിം ഹൗസിന്റെ ബാനറില്‍ സിബി തോട്ടുപുറം, നേവീസ് സേവ്യര്‍ എന്നിവരാണ് ചിത്രം നിര്‍മിച്ചിരിക്കുന്നത്.
