മലയാളത്തിലെ പരിചയ സമ്പന്നരായ സംവിധായകരിൽ ഒരാളാണ് വിനയൻ. 1990 കൾ മുതൽ മലയാള സിനിമയിൽ നിറഞ്ഞു നിൽക്കുന്ന അദ്ദേഹം ഒട്ടേറെ സൂപ്പർ ഹിറ്റ് സിനിമകൾ മലയാള സിനിമാ പ്രേക്ഷകർക്ക് നൽകിയിട്ടുണ്ട്. എന്നാൽ ഒരിടക്ക് മോഹൻലാൽ, മമ്മൂട്ടി തുടങ്ങി മലയാളത്തിലെ സൂപ്പർ താരങ്ങളേയും മലയാള സിനിമാ സംഘടനാ ഭാരവാഹികളെയുമൊക്കെ കടുത്ത ഭാഷയിൽ വിമർശിച്ച വിനയന് പിന്നീട് മുഖ്യധാരാ മലയാള സിനിമയിൽ നിന്ന് വിലക്ക് നേരിടേണ്ടി വന്നിരുന്നു. എന്നാൽ മോഹൻലാൽ അമ്മ പ്രസിഡന്റ് ആയി സ്ഥാനം ഇട്ടതിനു പിന്നാലെ അദ്ദേഹം തന്നെ മുൻകൈ എടുത്തു വിനയനുമായുള്ള പിണക്കം തീർക്കുകയും വിനയൻ വീണ്ടും സിനിമ ചെയ്തു കൊണ്ട് മുന്നോട്ടു വരികയും ചെയ്തു.
ഇപ്പോൾ വിനയൻ സംവിധാനം ചെയ്ത ആകാശ ഗംഗ 2 എന്ന ചിത്രം റിലീസ് ചെയ്തിരിക്കുകയാണ്. വിനയന്റെ തന്നെ സൂപ്പർ ഹിറ്റ് ഹൊറർ കോമഡി ചിത്രത്തിന്റെ രണ്ടാം ഭാഗം ആണിത്. മമ്മൂട്ടിയെ വെച്ച് ദാദ സാഹിബ്, രാക്ഷസ രാജാവ് എന്നീ രണ്ടു ചിത്രങ്ങൾ ചെയ്ത വിനയൻ മോഹൻലാലിനെ നായകനാക്കി ഇതുവരെ ചിത്രങ്ങൾ ഒന്നും തന്നെ ചെയ്തിട്ടില്ല. എന്നാൽ തന്റെ കരിയറിലെ ഏറ്റവും മികച്ച ചിത്രമാകും താൻ മോഹൻലാലിന് വേണ്ടി ഒരുക്കുക എന്നും ആ ചിത്രം അടുത്ത വർഷം അവസാനത്തോടെ സംഭവിക്കും എന്നും വിനയൻ പറഞ്ഞിരുന്നു. എന്നാൽ വിനയൻ രാവണൻ ആയി മോഹൻലാലിനെ ചിത്രീകരിച്ച ഒരു പെയിന്റിംഗ് ഒരിക്കൽ തന്റെ ഫേസ്ബുക് പേജിൽ ഷെയർ ചെയ്തതോടെ മോഹൻലാൽ- വിനയൻ ചിത്രം രാവണൻ എന്ന ബിഗ് ബജറ്റ് ചിത്രമാണെന്ന വാർത്തകൾ എങ്ങും പരന്നു.
എന്നാൽ താനും മോഹൻലാലും ഒന്നിക്കുന്ന ചിത്രം രാവണൻ അല്ലെന്നും അങ്ങനെ ഒരു ചിത്രം ഇപ്പോൾ പ്ലാൻ ചെയ്യുന്നില്ല എന്നുമാണ് വിനയൻ പറയുന്നത്. മോഹൻലാലുമായി ഒന്നിക്കുന്ന ഒരു ചിത്രം അടുത്ത വർഷം അവസാനത്തോടെ സംഭവിച്ചേക്കാം എന്നും എന്നാൽ അത് രാവണൻ ആയിരിക്കില്ല എന്നുമാണ് വിനയൻ ഒരു മീഡിയ അഭിമുഖത്തിൽ പ്രതികരിച്ചത്. അത്തരമൊരു കഥാപാത്രം തന്റെ മനസ്സിൽ ഉണ്ട് എന്നല്ലാതെ അതാണ് താൻ ചെയ്യാൻ പോകുന്ന മോഹൻലാൽ ചിത്രം എന്നത് തെറ്റായ പ്രചാരണം ആണെന്നാണ് വിനയൻ പറയുന്നത്.
