തെലുങ്കിലെ സ്റ്റൈലിഷ് സൂപ്പർസ്റ്റാറാണ് അല്ലു അർജുൻ. അദ്ദേഹത്തിന്റെ ഏറ്റവും പുതിയ ചിത്രമായ അങ്ങ് വൈകുണ്ഠപുരത്ത് ഇപ്പോൾ സൂപ്പർ വിജയം നേടി മുന്നോട്ടു പോവുകയാണ്. ആന്ധ്രയിലും വിദേശ മാർക്കറ്റുകളിലും എല്ലാം ഈ ചിത്രം റെക്കോർഡ് കളക്ഷനാണ് നേടിയെടുക്കുന്നത്. ത്രിവിക്രം ശ്രീനിവാസ് ഒരുക്കിയ ഈ ചിത്രത്തിൽ അല്ലു അർജുനൊപ്പം ഒരു വലിയ താര നിരതന്നെ അണിനിരക്കുന്നുണ്ട്. പതിവുപോലെതന്നെ ഈ ചിത്രത്തിലും അല്ലു അർജുന്റെ ഡാൻസും ഫൈറ്റുമാണ് പ്രേക്ഷകർ ഏറെ ആസ്വദിക്കുന്നത്. ഇന്ത്യൻ സിനിമയിലെ തന്നെ ഏറ്റവും മികച്ച നർത്തകരിൽ ഒരാളായ അല്ലു അർജുൻ പറയുന്നത് ഇതൊക്കെ ചെയ്യാൻ തനിക്കു പ്രചോദനം ആകുന്നതു തന്റെ ഫാൻസ്‌ ആണെന്നാണ്.
അവരെ സന്തോഷിപ്പിക്കുക, തന്നെ സ്നേഹിക്കുന്ന ഓരോ പ്രേക്ഷകനും സന്തോഷം നൽകുക എന്നതാണ് തന്റെ ലക്‌ഷ്യം എന്നും അതിനു വേണ്ടി എന്തും ചെയ്യാൻ തയ്യാറാണ് എന്നും അദ്ദേഹം തുറന്നു പറയുന്നു. എത്ര പണവും പ്രശസ്തിയും ലഭിച്ചാലും നമ്മളെ സ്നേഹിക്കുന്നവരെ സന്തോഷിപ്പിക്കാനോ നമ്മുടെ പ്രകടനം കൊണ്ട് തൃപ്തിപ്പെടുത്താനോ സാധിച്ചില്ലെങ്കിൽ ആ പണത്തിനും പ്രശസ്തിക്കും ഒന്നും യാതൊരു അർത്ഥവും ഉണ്ടാവില്ല എന്നും അല്ലു അർജുൻ പറയുന്നു. കേരളത്തിലും വലിയ ആരാധക വൃന്ദമുള്ള നടനാണ് അല്ലു അർജുൻ. മലയാളി പ്രേക്ഷകർ മല്ലു അർജുൻ എന്നാണ് അദ്ദേഹത്തെ സ്നേഹത്തോടെ വിളിക്കുന്നത്. അങ്ങ് വൈകുണ്ഠപുരത്ത് എന്ന ചിത്രത്തിൽ അല്ലു അർജുനൊപ്പം മലയാളി താരങ്ങളായ ജയറാം, ഗോവിന്ദ് പദ്മ സൂര്യ എന്നിവരും അഭിനയിച്ചിട്ടുണ്ട്. അല്ലു അർജുൻ അവതരിപ്പിക്കുന്ന കഥാപാത്രത്തിന്റെ അച്ഛൻ ആയാണ് ജയറാം ഈ ചിത്രത്തിൽ പ്രത്യക്ഷപ്പെട്ടിരിക്കുന്നത്.
