നവാഗത സംവിധായകനായ ഡോക്ടർ പ്രഗാബൽ ഒരുക്കിയ മഡ്‌ഡി എന്ന മലയാള ചിത്രം റിലീസിന് ഒരുങ്ങുകയാണ്. ഇന്നാണ് ഈ ചിത്രത്തിന്റെ ആദ്യ ടീസർ പ്രേക്ഷകരുടെ മുന്നിലെത്തുന്നത്. ഇന്ന് വൈകുന്നേരം ഏഴു മണിക്ക് ഈ ടീസർ റിലീസ് ചെയ്യാൻ പോകുന്നത് മലയാളികളുടെ പ്രിയ താരം മെഗാ സ്റ്റാർ മമ്മൂട്ടിയാണ്. തന്റെ ഒഫീഷ്യൽ ഫേസ്ബുക് പേജിലൂടെയാണ് മമ്മൂട്ടി ഈ ചിത്രത്തിന്റെ ടീസർ റിലീസ് ചെയ്യാൻ പോകുന്നത്. പി കെ സെവൻ ക്രിയേഷൻസിന്റെ ബാനറിൽ പ്രേമ കൃഷ്ണ ദാസ് അവതരിപ്പിക്കുന്ന ഈ ചിത്രത്തിന്റെ തിരക്കഥയും സംഭാഷണങ്ങളും ഒരുക്കിയിരിക്കുന്നത് സംവിധായകനും മഹേഷ് ചന്ദ്രൻ, ശ്രീനാഥ് നായർ എന്നിവരും ചേർന്നാണ്. കെ ജി രതീഷ് ആണ് ഈ ചിത്രത്തിന് വേണ്ടി ക്യാമറ ചലിപ്പിച്ചിരിക്കുന്നതു.
സാൻ ലോകേഷ് എഡിറ്റിംഗ് നിർവഹിച്ചിരിക്കുന്ന ഈ ചിത്രത്തിന് വേണ്ടി സംഗീത സംവിധാനം നിർവഹിച്ചിരിക്കുന്നത് രവി ബസ്‌റൂരും സംഘട്ടനം ഒരുക്കിയിരിക്കുന്നത് റൺ രവിയുമാണ്. ഇതിന്റെ ടൈറ്റില് പോസ്റ്റർ വലിയ പ്രേക്ഷക ശ്രദ്ധയാണ് നേടിയെടുത്തിരുന്നത്. ആക്ഷന് പ്രാധാന്യമുള്ള ഒരു ചിത്രമാണ് ഇതെന്ന സൂചനയും ഇതിന്റെ ടൈറ്റിലും ടൈറ്റിൽ പോസ്റ്ററും തരുന്നുണ്ട്. എങ്കിലും ഇതിന്റെ ടീസർ കണ്ടാൽ മാത്രമേ ഈ ചിത്രം എങ്ങനെയുള്ള ഒരു സിനിമാനുഭവമായിരിക്കും പ്രേക്ഷകന് കൊടുക്കുക എന്നറിയാൻ പറ്റു. അത് കൊണ്ട് തന്നെ സിനിമാ പ്രേമികൾ ആകാംഷാപൂർവമാണ് മെഗാ സ്റ്റാർ റിലീസ് ചെയ്യാൻ പോകുന്ന ഇതിന്റെ ആദ്യ ടീസറിന് വേണ്ടി കാത്തിരിക്കുന്നത്. അധികം വൈകാതെ തന്നെ ചിത്രത്തിന്റെ ട്രെയ്‌ലറും റിലീസ് ഡേറ്റും അണിയറ പ്രവർത്തകർ പുറത്തു വിടുമെന്നാണ് പ്രതീക്ഷ.
