മലയാള സിനിമയിലെ ഏറ്റവും മികച്ച യുവ താരങ്ങളിൽ ഒരാളായ ടോവിനോ തോമസ് ഇന്ന് തന്റെ ജന്മദിനം ആഘോഷിക്കുകയാണ്. ടോവിനോ ആരാധകർക്കൊപ്പം മലയാള സിനിമാ പ്രേമികളും മലയാള സിനിമാ പ്രവർത്തകരും അദ്ദേഹത്തിന് ജന്മദിന ആശംസകൾ നേർന്നു. അതിനു പുറമെ അദ്ദേഹത്തിന്റെ വരാനിരിക്കുന്ന ചിത്രങ്ങളുടെ അണിയറ പ്രവർത്തകർ അദ്ദേഹത്തിന്റെ ജന്മദിന സ്പെഷ്യൽ പോസ്റ്ററുകളും റിലീസ് ചെയ്തിട്ടുണ്ട്. മനു അശോകൻ ഒരുക്കുന്ന ഉയരെ എന്ന ചിത്രത്തിന്റെയും അരുൺ ബോസ് ഒരുക്കാൻ പോകുന്ന ലുക്കാ എന്ന ചിത്രത്തിന്റെയും സ്പെഷ്യൽ പോസ്റ്ററുകൾ ആണ് ടോവിനോക്കു വേണ്ടി റിലീസ് ചെയ്തത്.
ആസിഫ് അലിയും പാർവതിയും ടോവിനോക്കു ഒപ്പം അഭിനയിക്കുന്ന ചിത്രമാണ് ഉയരെ. ആഷിക് അബു ഒരുക്കുന്ന വൈറസ് എന്ന ചിത്രത്തിലും ടോവിനോ ഇപ്പോൾ അഭിനയിക്കുന്നുണ്ട്, നിപ്പ വൈറസ് ആക്രമണത്തെ അധികരിച്ചു നിർമ്മിക്കുന്ന ഈ ചിത്രത്തിൽ കോഴിക്കോട് ജില്ലാ കളക്ടറുടെ വേഷമാണ് ടോവിനോ തോമസ് ചെയ്യുന്നത്. ഇത് കൂടാതെ കൽക്കി എന്ന ഒരു ചിത്രവും ടോവിനോ തോമസ് ചെയ്യാൻ പോവുകയാണ്. ഒരു മാസ്സ് ആക്ഷൻ ചിത്രമായാണ് കൽക്കി ഒരുക്കാൻ പോകുന്നത്. ഈ കഴിഞ്ഞ ക്രിസ്മസിന് ടോവിനോയുടെ രണ്ടു ചിത്രങ്ങൾ റിലീസ് ചെയ്യുകയും, രണ്ടും ബോക്സ് ഓഫീസിൽ വിജയം നേടുകയും ചെയ്തിരുന്നു. എന്റെ ഉമ്മാന്റെ പേര് എന്ന മലയാള ചിത്രവും മാരി 2 എന്ന തമിഴ് ചിത്രവും ആയിരുന്നു അവ. തമിഴ് ചിത്രത്തിൽ വില്ലനായി ഗംഭീര പ്രകടനം നൽകിയ ടോവിനോ എന്റെ ഉമ്മാന്റെ പേര് എന്ന മലയാള ചിത്രത്തിൽ നായകനായും കയ്യടി നേടിയ പ്രകടനം തന്നെയാണ് കാഴ്ച വെച്ചത്. വ്യത്യസ്ത ചിത്രങ്ങളുമായി ഈ വർഷവും മലയാള സിനിമയിൽ നിറഞ്ഞു നില്ക്കാൻ ഉള്ള തയ്യാറെടുപ്പിൽ ആണ് ടോവിനോ തോമസ്.
