മലയാളത്തിന്റെ മഹാനടൻ മോഹൻലാൽ ഇന്ന് തന്റെ ഏറ്റവും പുതിയ ചിത്രത്തിന്റെ ഷൂട്ടിംഗ് ആരംഭിച്ചു. മാസ്റ്റർ ഡയറക്ടർ ലിജോ ജോസ് പെല്ലിശേരിക്കൊപ്പം മോഹൻലാൽ ആദ്യമായി കൈകോർക്കുന്ന മലൈക്കോട്ടൈ വാലിബനാണ്‌ ഇന്ന് നടന്ന പൂജ, സ്വിച്ച് ഓൺ കർമ്മത്തിലൂടെ ആരംഭിച്ചത്. രാജസ്ഥാനിലെ ജയ് സാൽമീറിലാണ് ഈ ചിത്രം ആരംഭിച്ചത്. അവിടെ നിന്നുള്ള ചിത്രങ്ങൾ മോഹൻലാൽ പങ്ക് വെച്ചിട്ടുണ്ട്. സൂപ്പർ ഹിറ്റ് സംവിധായകൻ ടിനു പാപ്പച്ചൻ ആണ് ഈ ചിത്രത്തിൽ ലിജോ ജോസ് പെല്ലിശ്ശേരിയുടെ അസ്സോസിയേറ്റ് ഡയറക്ടർ ആയെത്തുന്നത്. ജയ് സാൽമീർ കൂടാതെ ഈ ചിത്രത്തിന് കൊച്ചിയിലും ഒരു ഷെഡ്യൂൾ ഉണ്ടാവുമെന്ന് വാർത്തകളുണ്ട്. ഗുസ്‍തിയുടെ പശ്ചാത്തലത്തിൽ ഒരുക്കുന്ന ഈ ചിത്രത്തിന് വേണ്ടി വർക്ക് ഔട്ട് ചെയ്യുന്ന മോഹൻലാലിന്റെ വീഡിയോ നേരത്തെ വൈറലായിരുന്നു.
ലിജോയുടെ കഥയ്ക്ക് പി എസ് റഫീഖ് തിരക്കഥ രചിച്ച ഈ ചിത്രത്തിൽ കാത്ത നന്ദി, രാജ്പാൽ യാദവ്, സോണാലി, ഹരീഷ് പേരാടി, ഡാനിഷ് തുടങ്ങി ഒട്ടേറെ കലാകാരൻമാർ വേഷമിടുന്നുണ്ട്. ഒരു വമ്പൻ മാസ് പീരീഡ് ആക്ഷൻ ഡ്രാമയാണ് ഈ ചിത്രമെന്നാണ് വാർത്തകൾ വരുന്നത്. ഷിബു ബേബി ജോണിന്റെ ജോൺ മേരി ക്രീയേറ്റീവ്, സെഞ്ച്വറി ഫിലിംസ്, മാക്സ്‌ലാബ് എന്നിവർ ചേർന്ന് നിർമ്മിക്കുന്ന ഈ ചിത്രത്തിന് ക്യാമറ ചലിപ്പിക്കുന്നത് മധു നീലകണ്ഠൻ, സംഗീതമൊരുക്കുന്നത് പ്രശാന്ത് പിള്ളൈ, എഡിറ്റ് ചെയ്യുന്നത് ദീപു ജോസഫ് എന്നിവരാണ്. വമ്പൻ തെന്നിന്ത്യൻ ചിത്രങ്ങളായ കാന്താര, കെ ജി എഫ് എന്നിവയുടെ സംഘട്ടനം ഒരുക്കിയ വിക്രം മോർ ആണ് ഈ ചിത്രത്തിനും ആക്ഷൻ രംഗങ്ങൾ ഒരുക്കുന്നത്.
