ഇത്തവണത്തെ ക്രിസ്മസിന് മോഹൻലാൽ – മമ്മൂട്ടി ബോക്സ് ഓഫിസ് പോരാട്ടം കാണാൻ ഇരുന്ന ആരാധകർക്ക് നിരാശ സമ്മാനിച്ച് കൊണ്ട് മോഹൻലാൽ ചിത്രമായ ബിഗ് ബ്രദർ റിലീസ് ജനുവരിയിലേക്കു മാറ്റി. മോഹൻലാലിനെ നായകനാക്കി സിദ്ദിഖ് രചിച്ചു സംവിധാനം ചെയ്യുന്ന ഈ ബിഗ് ബജറ്റ് ചിത്രത്തിന്റെ ഷൂട്ടിംഗ് ഇപ്പോഴും നടക്കുകയാണ്. ഡിസംബർ ആദ്യ വാരത്തോടെ മാത്രമേ ഈ ചിത്രത്തിന്റെ ഷൂട്ടിംഗ് തീരുകയുള്ളു എന്നും അത് കൊണ്ടാണ് റിലീസ് ജനുവരി അവസാന വാരത്തിലേക്കു മാറ്റുന്നത് എന്നുമാണ് റിപ്പോർട്ടുകൾ സൂചിപ്പിക്കുന്നത്. എസ് ടാകീസ്, നിക്, വൈശാഖ സിനിമ എന്നിവയുടെ ബാനറിൽ സംവിധായകൻ സിദ്ദിഖ്, ജെൻസോ ജോസ്, വൈശാഖ് രാജൻ എന്നിവർ നിർമ്മിക്കുന്ന ഈ ചിത്രം ഒരു കംപ്ലീറ്റ് ഫാമിലി എന്റെർറ്റൈനെർ ആയിരിക്കും എന്നാണ് സൂചന.
മമ്മൂട്ടിയുടെ ഷൈലോക്ക് എന്ന ചിത്രം ഡിസംബർ ഇരുപതിനും മോഹൻലാലിന്റെ ബിഗ് ബ്രദർ ഡിസംബർ പത്തൊന്പതിനും റിലീസ് ചെയ്യും എന്നായിരുന്നു ആദ്യം വന്ന റിപ്പോർട്ട്. ഏതായാലും ഈ വർഷം ഇനി മോഹൻലാലിനെ വെള്ളിത്തിരയിൽ കാണാൻ സാധിക്കില്ല എന്നുറപ്പായി കഴിഞ്ഞു. നൂറു കോടി ക്ലബിൽ എത്തിയ ബ്ലോക്ക്ബസ്റ്റർ ചിത്രം ലൂസിഫറും സൂപ്പർ ഹിറ്റായ ഓണ ചിത്രം ഇട്ടിമാണിയുമായി മികച്ച ഒരു വർഷത്തിലൂടെ ആണ് മോഹൻലാൽ കടന്നു പോയത്. അദ്ദേഹം അഭിനയിച്ച കാപ്പാൻ എന്ന തമിഴ് ചിത്രവും നൂറു കോടി ക്ലബിൽ എത്തിയതായി നിർമ്മാതാക്കൾ സ്ഥിതീകരിച്ചിരുന്നു. സൂര്യ നായകനായ ഈ കെ വി ആനന്ദ് ചിത്രത്തിൽ മോഹൻലാൽ ഇന്ത്യൻ പ്രധാന മന്ത്രി ആയാണ് അഭിനയിച്ചത്.
