മലയാളത്തിന്റെ മഹാനടൻ മോഹൻലാലിന്റെ വമ്പൻ ചിത്രമായ മലൈക്കോട്ടൈ വാലിബന്റെ റിലീസ് തീയതി പ്രഖ്യാപിച്ചതോടെ ആരാധകരും സിനിമാ പ്രേമികളും മലയാള സിനിമാ ലോകവും ആവേശത്തിലാണ്. അടുത്ത ജനുവരി 25 നാണ് ഈ ലിജോ ജോസ് പെല്ലിശ്ശേരി- മോഹൻലാൽ ചിത്രം പ്രേക്ഷകരുടെ മുന്നിലെത്താൻ പോകുന്നത്. വമ്പൻ ബഡ്ജറ്റിലൊരുക്കിയ ഈ പാൻ ഇന്ത്യൻ ചിത്രം മലയാളം, തമിഴ്, കന്നഡ, ഹിന്ദി, തെലുങ്ക് ഭാഷകളിലാണ് റിലീസ് ചെയ്യുന്നത്. ഇപ്പോഴിതാ മലയാള സിനിമക്കും സിനിമാസ്വാദകർക്കും ആവേശമായി, മറ്റ് രണ്ട് മോഹൻലാൽ ചിത്രങ്ങളുടെ റിലീസ് പ്ലാനുകൾ കൂടി ചർച്ച ചെയ്യപ്പെടുകയാണ്. ഏറ്റവും പുതിയ റിപ്പോർട്ടുകൾ പ്രകാരം, മോഹൻലാലിനെ നായകനാക്കി ജീത്തു ജോസഫ് ഒരുക്കുന്ന ഏറ്റവും പുതിയ ചിത്രമായ നേര് നവംബർ മാസത്തിൽ പ്രേക്ഷകരുടെ മുന്നിലെത്തിക്കാനുള്ള ശ്രമത്തിലാണ് അണിയറ പ്രവർത്തകർ.
ഒരു ഇമോഷണൽ കോർട്ട് റൂം ഡ്രാമയായി ഒരുക്കുന്ന ഈ ചിത്രത്തിൽ വക്കീൽ വേഷത്തിലാണ് മോഹൻലാൽ അഭിനയിക്കുന്നത്. പ്രിയാമണി നായികാ വേഷം ചെയ്യുന്നഈ ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് നിർമ്മിക്കുന്നത്. ഇത് കൂടാതെ മറ്റൊരു വമ്പൻ മോഹൻലാൽ ചിത്രവും ഈ വർഷം തന്നെ റിലീസ് പ്ലാൻ ചെയ്യുന്നുണ്ട്. മോഹൻലാൽ ആദ്യമായി സംവിധാനം ചെയ്ത ബിഗ് ബഡ്ജറ്റ് ത്രീഡി ഫാന്റസി ചിത്രമായ ബറോസ് ആണ് ക്രിസ്മസ് റിലീസായി പ്ലാൻ ചെയ്യുന്നത്. ഡിസംബർ 21 ന് റിലീസ് പ്ലാൻ ചെയ്യുന്ന ഈ ചിത്രവും ഒട്ടേറെ ഭാഷകളിലായാണ് പ്രേക്ഷകരുടെ മുന്നിലെത്തുക. ഇപ്പോൾ വിദേശത്ത് പോസ്റ്റ് പ്രൊഡക്ഷൻ ജോലികൾ പുരോഗമിക്കുന്ന ബറോസിന്റെ റിലീസ് പ്ലാൻ അധികം വൈകാതെ തന്നെ പ്രേക്ഷകരുടെ മുന്നിലെത്തും. അപ്രതീക്ഷിതമായ രീതിയിൽ ജോലികൾ തീരാൻ വൈകിയാൽ മാത്രമേ ബറോസ് റിലീസ് അടുത്ത വർഷം മാർച്ചിലേക്ക് നീട്ടുകയുള്ളു എന്നാണ് വാർത്തകൾ വരുന്നത്.
