മലയാളത്തിന്റെ സ്വന്തം മോഹൻലാൽ ഗൗതം വാസുദേവ് മേനോൻ എന്ന മാസ്റ്റർ ഡിറക്ടറോടൊപ്പം കൈ കോർക്കാൻ പോവുകയാണെന്ന് സൂചന. തെന്നിന്ത്യയിലെ ഏറ്റവും അധികം ആരാധകർ ഉള്ള ഒരു സംവിധായകനായ ഗൗതം വാസുദേവ് മേനോൻ മോഹൻലാലിൻറെ ഒരു ആരാധകൻ കൂടിയാണ് . മലയാളത്തിൽ ഒരു ചിത്രം ഒരുക്കാനായി ഏറെ നാളായി കാത്തിരിക്കുക കൂടിയാണ് ഗൗതം മേനോൻ.
മോഹൻലാലുമൊത്തു ഒരു ചിത്രം ചെയ്യുകയാണ് തന്റെ ഏറ്റവും വലിയ സ്വപ്നങ്ങളിൽ ഒന്ന് എന്ന് പല തവണ മാധ്യമങ്ങളിലൂടെ പറഞ്ഞിട്ടുള്ള ഗൗതം മേനോൻ , ഇപ്പോൾ വെളിപ്പെടുത്തുന്നത് മോഹൻലാലുമൊത്തു ഒരുപാട് വൈകാതെ ഒന്നിക്കാനുള്ള സാധ്യതകളെ കുറിച്ചാണ്. രണ്ടാഴ്ച മുൻപേ താൻ മോഹൻലാലിനോട് ഒരു കഥ പറഞ്ഞിട്ടുണ്ട് എന്നാണ് ഗൗതം മേനോൻ പറഞ്ഞത്.
അടുത്ത വർഷം താൻ ഒരു മലയാള ചിത്രം ചെയ്യുമെന്നും ഗൗതം മേനോൻ പറഞ്ഞിട്ടുണ്ട്. ആ ചിത്രത്തിൽ മോഹൻലാൽ ആയിരിക്കുമോ നായകൻ എന്നാണ് ഇനി അറിയാൻ ഉള്ളത്.
കമൽ ഹാസനെ വെച്ച് ചിത്രം സംഭവിച്ചത് പോലെ തന്നെ മറ്റൊരു അഭിനയ വിസ്മയം ആയ മോഹൻലാലിനെ വെച്ചും തനിക്കു ഒരു ചിത്രം ചെയ്യാൻ സാധിക്കും എന്നാണ് വിശ്വാസം എന്നും ഗൗതം മേനോൻ പറയുന്നു.
മലയാളത്തിൽ ഒരു ചിത്രം ചെയ്യുന്നതിനായി മോഹൻലാലിന് പുറമെ ഫഹദ്, പൃഥ്വിരാജ്, നിവിൻ, വിനായകൻ തുടങ്ങിയവരൊക്കെയായി സംസാരിച്ചിട്ടുണ്ട് എന്നും ഗൗതം മേനോൻ പറഞ്ഞു. ഒട്ടനവധി ചിത്രങ്ങളുടെ തിരക്കിൽ ആണ് മോഹൻലാൽ ഇപ്പോൾ. ഒടിയൻ, അജോയ് വർമ്മ ചിത്രം, ഭദ്രൻ ചിത്രം അരുൺ ഗോപി ചിത്രം, പ്രിത്വി രാജ് ചിത്രം, രണ്ടാമൂഴം, പ്രിയദർശൻ ചിത്രം, ഷാജി കൈലാസ് ചിത്രം തുടങ്ങി വമ്പൻ പ്രോജക്ടുകളുടെ ഒരു അവസാനിക്കാത്ത നിര തന്നെയാണ് മോഹൻലാലിനെ കാത്തിരിക്കുന്നത്.
