മലയാളത്തിലെ താര ചക്രവർത്തിയായ മോഹൻലാലിൻറെ ഈ വർഷത്തെ ആദ്യ റിലീസ് ആയിരിക്കും ബോളിവുഡ് സംവിധായകനായ അജോയ് വർമ്മ സംവിധാനം ചെയ്യുന്ന നീരാളി. ഇപ്പോൾ ഷൂട്ടിംഗ് തീർന്നു പോസ്റ്റ്-പ്രൊഡക്ഷൻ സ്റ്റേജിൽ ഉള്ള ഈ ചിത്രം ഈ വർഷം മെയ് അല്ലെങ്കിൽ ജൂൺ മാസത്തിൽ പ്രദർശനത്തിന് എത്തും. ബോളിവുഡിൽ രണ്ടു ചിത്രങ്ങൾ സംവിധാനം ചെയ്യുകയും ഒരുപിടി മികച്ച ചിത്രങ്ങൾക്ക് എഡിറ്റിംഗ് നിർവഹിക്കുകയും ചെയ്ത അജോയ് വർമയുടെ ആദ്യ മലയാള ചിത്രമാണ് നീരാളി. ഈ ചിത്രത്തിൽ മോഹൻലാൽ ആരാധകർക്ക് വേണ്ടി ഒരുക്കുന്ന പുതുമയാണ് ഇപ്പോൾ സോഷ്യൽ മീഡിയയിൽ ചർച്ചാ വിഷയം ആയിരിക്കുന്നത്. അദ്ദേഹത്തിന്റെ കഥാപാത്രം തന്നെയാണത്. ഒരു ജെമ്മോളജിസ്റ് ആയാണ് മോഹൻലാൽ ഈ ചിത്രത്തിൽ അഭിനയിക്കുന്നത്.
വജ്രങ്ങളുടെയും രത്‌നങ്ങളുടെയും മൂല്യവും ഗുണവും അളക്കുന്നവരാണ് ജെമ്മോളജിസ്റ് എന്നറിയപ്പെടുന്നതു. തന്റെ കരിയറിൽ ആദ്യമായാണ് മോഹൻലാൽ ഇത്തരം ഒരു കഥാപാത്രത്തെ അവതരിപ്പിച്ചത്. മോഹൻലാൽ ഈ ചിത്രത്തിൽ അഭിനയിച്ചില്ലെങ്കിൽ മനോജ് ബാജ്‌പേയി എന്ന ബോളിവുഡ് നടനെ വെച്ച് ഈ ചിത്രം ഹിന്ദിയിൽ ഒരുക്കാനായിരുന്നു അജോയ് വർമയുടെ പ്ലാൻ. ബോളിവുഡിലെ എണ്ണം പറഞ്ഞ അഭിനേതാക്കളിൽ ഒരാൾ ആണ് മനോജ് ബാജ്‌പേയി. പക്ഷെ മോഹൻലാൽ ഇതിന്റെ കഥ കേട്ട് ത്രില്ലടിക്കുകയും ഉടനെ തന്നെ ഡേറ്റ് നല്കുകയുമാണുണ്ടായത്. നവാഗതനായ സാജു തോമസ് തിരക്കഥ ഒരുക്കിയ ഈ ചിത്രത്തിൽ നദിയ മൊയ്തു, സുരാജ് വെഞ്ഞാറമൂട്, ദിലീഷ് പോത്തൻ, നാസ്സർ, പാർവതി നായർ തുടങ്ങി ഒരു മികച്ച താര നിര തന്നെ പ്രത്യക്ഷപ്പെടുന്നുണ്ട്. ബോളിവുഡിൽ നിന്നുള്ളവരാണ് ഈ ചിത്രത്തിന്റെ സാങ്കേതിക പ്രവർത്തകർ എല്ലാവരും തന്നെ. നീരാളിയുടെ ടീസർ മാർച്ച് ആദ്യ വാരം എത്തും എന്നാണ് ഇപ്പോൾ ലഭിക്കുന്ന റിപ്പോർട്ടുകൾ പറയുന്നത്. സ്റ്റീഫൻ ദേവസ്സി സംഗീതം ഒരുക്കിയ ഈ ചിത്രത്തിൽ മോഹൻലാൽ ശ്രേയ ഘോഷാലിനൊപ്പം ഒരു ഗാനം ആലപിച്ചിട്ടും ഉണ്ട്.
