കോവിഡ് പ്രതിസന്ധി മലയാള സിനിമയെ ഗ്രസിച്ചപ്പോൾ അതിൽ നിന്നും മലയാള സിനിമയെ കൈപിടിച്ചുയർത്തിയ സൂപ്പർ താരമാണ് മോഹൻലാൽ. കഴിഞ്ഞ വർഷം ലോക്ക് ഡൌൺ നിയന്ത്രണങ്ങൾ നിലനിൽക്കെ തന്നെ ദൃശ്യ 2 എന്ന ചിത്രം ഒരുക്കാൻ മുൻകൈ എടുത്ത അദ്ദേഹം മലയാള സിനിമയെ വീണ്ടും സജീവമാക്കാൻ മുന്നിൽ തന്നെ നിൽക്കുകയായിരുന്നു. ഒരുപാട് താരങ്ങൾ സിനിമകൾ ഒരുക്കാൻ മടിച്ചു നിന്നപ്പോൾ ഈ കാലയളവിൽ മോഹൻലാൽ തീർത്തത് ദൃശ്യം 2 , ആറാട്ടു എന്നീ ചിത്രങ്ങൾ ആണ്. അതോടൊപ്പം പൃഥ്വിരാജ് സുകുമാരൻ ഒരുക്കുന്ന ബ്രോ ഡാഡി എന്ന ചിത്രവും ഈ മാസത്തോടെ അദ്ദേഹം തീർക്കും. താൻ ആദ്യമായി സംവിധാനം ചെയ്യുന്ന ബാരോസ് എന്ന ചിത്രവും ഇതേ കാലയളവിൽ ചിത്രീകരിച്ചു തുടങ്ങിയ മോഹൻലാൽ ഉടൻ തന്നെ ജീത്തു ജോസഫ് ചിത്രമായ 12 ത് മാനിലും ജോയിൻ ചെയ്യും. മരക്കാർ എന്ന ബ്രഹ്മാണ്ഡ മോഹൻലാൽ ചിത്രമാണ് കേരളത്തിലെ തീയേറ്ററുകൾ ഏറ്റവും കൂടുതൽ പ്രതീക്ഷയർപ്പിച്ചിരിക്കുന്ന ചിത്രമെന്നതും ഇദ്ദേഹത്തെ ഇന്നത്തെ മലയാള സിനിമയുടെ നട്ടെല്ലും ആത്മവിശ്വാസവും ആക്കി മാറ്റുന്നു. ഇപ്പോഴിതാ സിനിമാ രംഗത്തിനു നൽകിയ അമൂല്യമായ സംഭാവനകൾ പരിഗണിച്ചു യു എ ഇ സർക്കാർ അദ്ദേഹത്തെ ആദരിക്കാൻ തീരുമാനിച്ചിരിക്കുകയാണ്.
അതിനായി അദ്ദേഹത്തിന് ഗോൾഡൻ വിസ നൽകുകയും ചെയ്തു അവർ. മലയാളത്തിലെ മറ്റൊരു സൂപ്പർ താരമായ മമ്മൂട്ടിക്കും അവർ ഗോൾഡൻ വിസ നൽകി ആദരിക്കും. ഗോൾഡൻ വിസ സ്വീകരിക്കാൻ കഴിഞ്ഞ ദിവസം ദുബായിൽ എത്തിയ മമ്മൂട്ടിക്ക് പിന്നാലെ ഇന്ന് മോഹൻലാലും അവിടെ എത്തിച്ചേർന്നിരിക്കുകയാണ്. അധികം വൈകാതെ തന്നെ ഇരുവരും ഗോൾഡൻ വിസ സ്വീകരിക്കും. ഗൾഫിൽ എത്തിയ മോഹൻലാലിന്റെ പുതിയ ചിത്രങ്ങൾ ഇപ്പോൾ സോഷ്യൽ മീഡിയയിൽ വൈറലാവുകയാണ്. ദുബായിൽ നിന്നും തിരിച്ചെത്തി ബ്രോ ഡാഡി പൂർത്തിയാക്കുന്ന മോഹൻലാൽ അതിനു ശേഷം 12 ത് മാനിൽ ജോയിൻ ചെയ്യും.
