കമ്പ്ലീറ്റ് ആക്ടർ മോഹൻലാൽ നായകനായി എത്തുന്ന പുതിയ ചിത്രം കഴിഞ്ഞ ദിവസം മുതൽ മുംബൈയിൽ ഷൂട്ടിങ് ആരംഭിച്ചു. മോഹൻലാൽ തന്നെയാണ് ഈ വിവരം തന്റെ ഫേസ്ബുക് പേജിലൂടെ അറിയിച്ചത്. ബോളിവുഡ് സംവിധായകനായ അജോയ് വർമ്മ ഒരുക്കുന്ന ത്രില്ലർ ചിത്രം നിർമ്മിക്കുന്നത് മൂൺഷോട്ട് എന്റെർറ്റൈന്മെന്റിന്റെ ബാനറിൽ സന്തോഷ് ടി കുരുവിളയാണ്. സാജു തോമസ് തിരക്കഥ രചിച്ചിരിക്കുന്ന ഈ ചിത്രം മുംബൈ, മംഗോളിയ, തായ്‌ലൻഡ് എന്നിവിടങ്ങളിൽ ആയി ആണ് പൂർത്തിയാവുക. ഈ ചിത്രത്തിന്റെ തിരക്കഥ വളരെ രസകരമാണെന്നും അതുകൊണ്ടു തന്നെ ഇതിന്റെ ഭാഗം ആവുന്നതിന്റെ ആവേശത്തിൽ ആണ് താനെന്നുമാണ് മോഹൻലാൽ പറയുന്നത്. തന്റെ പുതിയ സ്ലിം ലുക്കിൽ ആയിരിക്കും മോഹൻലാൽ ഈ ചിത്രത്തിൽ പ്രത്യക്ഷപ്പെടുക.
പ്രശസ്ത ബോളിവുഡ് ഛായാഗ്രാഹകൻ സന്തോഷ് തുണ്ടിയിൽ ആണ് ഈ ചിത്രത്തിന് വേണ്ടി കാമറ ചലിപ്പിക്കുന്നത്. മീന മോഹൻലാലിൻറെ നായിക ആയെത്തുന്ന ഈ ചിത്രത്തിൽ തൃഷയും ഒരു വേഷം അവതരിപ്പിക്കുന്നുണ്ട്. അതുപോലെ തന്നെ പ്രകാശ് രാജ് ഈ ചിത്രത്തിൽ ഒരു പ്രധാന വേഷം അവതരിപ്പിക്കും എന്നും റിപ്പോർട്ടുകൾ പറയുന്നുണ്ട്. മേൽ പറഞ്ഞ ലൊക്കേഷനുകൾ കൂടാതെ പുണെയിലും ഈ ചിത്രം ഷൂട്ട് ചെയ്യും. ഇതുവരെ പേരിട്ടിട്ടില്ലാത്ത ഈ ചിത്രം ഡ്രാമ ത്രില്ലർ വിഭാഗത്തിൽ പെടുന്ന ഒരു ചിത്രമാണ് എന്നാണ് സൂചന. മെയ് ആദ്യ വാരം ഈ ചിത്രം തീയേറ്ററുകളിൽ എത്തുമെന്നാണ് കരുതപ്പെടുന്നത്. ഈ ചിത്രം പൂർത്തിയാക്കിയതിനു ശേഷം മോഹൻലാൽ റോഷൻ ആൻഡ്രൂസ്- നിവിൻ പോളി ടീമിന്റെ കായംകുളം കൊച്ചുണ്ണിയിലെ അതിഥി വേഷവും അതുപോലെ തന്നെ തന്റെ ബ്രഹ്മാണ്ഡ ചിത്രമായ ഒടിയനും പൂർത്തിയാക്കും.
