മലയാളത്തിന്റെ ലേഡി സൂപ്പർ സ്റ്റാർ എന്ന വിശേഷണം ഉള്ള നടിയാണ് മഞ്ജു വാര്യർ. മലയാള സിനിമ കണ്ട എക്കാലത്തെയും മികച്ച നടിമാരിൽ ഒരാളായ മഞ്ജു വാര്യർ ആദ്യമായി ഒരു തമിഴ് സിനിമയിൽ അഭിനയിച്ചത് ഈ വർഷമാണ്. ധനുഷിനെ നായകനാക്കി വെട്രിമാരൻ ഒരുക്കിയ അസുരൻ എന്ന ചിത്രത്തിലാണ് മഞ്ജു വാര്യർ നായികാ വേഷത്തിൽ എത്തിയത്. പച്ചൈയമ്മാൾ എന്ന തന്റെ കഥാപാത്രത്തെ ഈ നടി അതിമനോഹരമായി തന്നെ അവതരിപ്പിക്കുകയും ചെയ്തു. ധനുഷിനൊപ്പം ചിത്രത്തിൽ നിറഞ്ഞു നിന്ന മഞ്ജുവിന് ഉലക നായകൻ കമല ഹാസനിൽ നിന്ന് വരെ അഭിനന്ദനം ലഭിച്ചു. മഞ്ജുവിനെ നേരിട്ട് കണ്ടാണ് കമൽ അഭിന്ദനം അറിയിച്ചത്.
ഇപ്പോൾ അസുരൻ എന്ന ഈ ചിത്രം നൂറു കോടി ക്ലബിലും ഇടം പിടിച്ചതോടെ ഈ വർഷം മഞ്ജു നായികാ വേഷത്തിൽ എത്തിയ രണ്ടാമത്തെ ചിത്രമാണ് ഈ നേട്ടം സ്വന്തമാക്കിയത്. മലയാളത്തിൽ മഞ്ജു നായികാ വേഷം ചെയ്ത മോഹൻലാൽ ചിത്രം ലൂസിഫറും നൂറു കോടി ക്ലബിൽ എത്തിയിരുന്നു. ഇപ്പോഴിതാ ഇതിനെല്ലാം പുറമെ സൂപ്പർ സ്റ്റാർ രജനികാന്തിന്റെ നായികാ വേഷം ചെയ്യാനുള്ള അവസരമാണ് മഞ്ജുവിനെ തേടി എത്തിയിരിക്കുന്നത് എന്നാണ് റിപ്പോർട്ടുകൾ പറയുന്നത്. രജനികാന്തിനെ നായകനാക്കി ശിവ ഒരുക്കുന്ന ചിത്രത്തിൽ നായികാ വേഷം ചെയ്യാൻ മഞ്ജുവിനെ ആണ് പരിഗണിക്കുന്നത് എന്നാണ് സ്ഥിതീകരിക്കാത്ത വാർത്തകൾ വരുന്നത്.
എന്തിരൻ , പേട്ട എന്നീ ചിത്രങ്ങൾക്ക് ശേഷം സൺ പിക്ചേഴ്സ് രജനികാന്തിനെ വെച്ച് നിർമ്മിക്കുന്ന ചിത്രം അധികം വൈകാതെ തന്നെ ആരംഭിക്കും. അജിത് നായകനായ വിശ്വാസം എന്ന ബ്ലോക്ക്ബസ്റ്റർ ചിത്രത്തിന് ശേഷം ശിവ ഒരുക്കാൻ പോകുന്ന ചിത്രമാണിത്. എ ആർ മുരുഗദോസ് സംവിധാനം ചെയ്ത ദർബാർ ആണ് രജനികാന്തിന്റെ അടുത്ത റിലീസ്. വരുന്ന പൊങ്കലിന് ഈ ചിത്രം റിലീസ് ചെയ്യും. മോഹൻലാൽ നായകനായ മരക്കാർ അറബിക്കടലിന്റെ സിംഹം എന്ന ബ്രഹ്മാണ്ഡ ചിത്രത്തിലും നായികയായ മഞ്ജു, മലയാളത്തിലും കൈ നിറയെ ചിത്രങ്ങളുമായി തിരക്കിലാണ്.
