മെഗാസ്റ്റാർ മമ്മൂട്ടി നായകനായി എത്തുന്ന നൻ പകൽ നേരത്ത് മയക്കം നാളെ പ്രേക്ഷകരുടെ മുന്നിലെത്തുകയാണ്. ഏതാനും ദിവസങ്ങൾക്കു മുൻപ് അഡ്വാൻസ് ബുക്കിംഗ് ആരംഭിച്ച ഈ ചിത്രത്തിന് മികച്ച പ്രതികരണമാണ് ലഭിക്കുന്നത്. കേരളമുടനീളം മികച്ച ബുക്കിംഗ് ലഭിക്കുന്ന ഈ ചിത്രം നാളെ മികച്ച ഓപ്പണിങ് നേടുമെന്നാണ് പ്രതീക്ഷിക്കപ്പെടുന്നത്. ലിജോ ജോസ് പെല്ലിശേരി സംവിധാനം ചെയ്ത ഈ ചിത്രത്തിന്റെ പ്രീമിയർ കഴിഞ്ഞ മാസമാണ് നടന്നത്. തിരുവനന്തപുരത്തു വെച്ച് നടന്ന കേരളാ അന്താരാഷ്ട്ര ചലച്ചിത്രോത്സവത്തിലാണ് ഈ ചിത്രം പ്രീമിയർ ചെയ്തത്. അവിടെ നിന്ന് മികച്ച പ്രേക്ഷകാഭിപ്രായമാണ് ഈ ചിത്രം നേടിയത്. നിരൂപകരും പുകഴ്ത്തിയ ഈ ചിത്രം ലിജോ ജോസ് പെല്ലിശേരിയുടെ കരിയറിലെ തന്നെ മികച്ച ചിത്രങ്ങളിൽ ഒന്നായാണ് വിലയിരുത്തപ്പെടുന്നത്. മമ്മൂട്ടിയുടെ മികച്ച പ്രകടനവും ഈ ചിത്രത്തിന്റെ ഹൈലൈറ്റുകളിൽ ഒന്നാണ്.
മമ്മൂട്ടി കമ്പനി എന്ന തന്റെ സ്വന്തം ബാനറിൽ മമ്മൂട്ടി നിർമ്മിച്ച ഈ ചിത്രം കേരളത്തിൽ വിതരണം ചെയ്യുന്നത് ദുൽഖർ സൽമാന്റെ വേ ഫെറർ ഫിലിംസ് ആണ്. എസ്‌ ഹരീഷ് രചന നിർവഹിച്ച ഈ ചിത്രം മലയാളത്തിലും തമിഴിലും ആയാണ് ഒരുക്കിയത്. പൂർണ്ണമായും പഴനിയിൽ ഷൂട്ട് ചെയ്ത ഈ ചിത്രത്തിൽ ഒരുപിടി പ്രശസ്ത താരങ്ങൾ അഭിനയിച്ചിട്ടുണ്ട്. രമ്യാ പാണ്ട്യൻ, അശോകൻ, കൈനകരി തങ്കരാജ്, സുരേഷ് ബാബു, ചേതൻ ജയലാൽ, അശ്വന്ത് അശോക് കുമാർ, രാജേഷ് ശർമ്മ എന്നിവരും വേഷമിട്ട ഈ ചിത്രത്തിന് ക്യാമറ ചലിപ്പിച്ചത് തേനി ഈശ്വറും എഡിറ്റ് ചെയ്തിരിക്കുന്നത് ദീപു ജോസഫുമാണ്. മമ്മൂട്ടിയെ വെച്ച് ലിജോ ആദ്യമായി സംവിധാനം ചെയ്ത ചിത്രമാണിത്.
