പ്രശസ്ത നടനും അവതാരകനും മിമിക്രി താരവുമൊക്കെയായ രമേശ് പിഷാരടി കഴിഞ്ഞ വർഷം സംവിധായകനായും മലയാള സിനിമയിൽ അരങ്ങേറ്റം കുറിച്ചിരുന്നു. ജയറാം, കുഞ്ചാക്കോ ബോബൻ എന്നിവർ നായക വേഷങ്ങൾ ചെയ്ത പഞ്ചവർണ്ണതത്ത എന്ന ചിത്രത്തിലൂടെ ആണ് രമേശ് പിഷാരടി സംവിധായകൻ ആയതു. ഇപ്പോഴിതാ തന്റെ രണ്ടാമത്തെ ചിത്രം ഒരുക്കുന്നതിന്റെ തിരക്കിൽ ആണ് അദ്ദേഹം. മമ്മൂട്ടി നായകനായി എത്തുന്ന ഗാനഗന്ധർവൻ എന്ന ചിത്രമാണ് രമേശ് പിഷാരടി ഇപ്പോൾ ഒരുക്കുന്നത്. തന്റെ ചിത്രത്തിലെ മമ്മൂട്ടി ഉള്ള സീനുകളുടെ ചിത്രീകരണം പൂർത്തിയായി എന്നും മമ്മുക്കയും ഒത്തുള്ള ദിവസങ്ങൾ മറക്കാൻ പറ്റില്ല എന്നും രമേശ് പിഷാരടി പറയുന്നു. മമ്മുക്കയെ വെച്ചൊരു പടം എടുക്കണം എന്ന് നമ്മൾ ആത്മാർത്ഥമായി ആഗ്രഹിച്ചാൽ ആ ആഗ്രഹം സാധ്യമാക്കാൻ മമ്മുക്ക നമ്മുടെ കൂടെ നിൽക്കും എന്നും രമേശ് പിഷാരടി പറയുന്നു.
മലയാള സിനിമയിൽ ഏറ്റവും കൂടുതൽ പുതിയ സംവിധായകർക്കു അവസരം കൊടുക്കുന്ന താരമാണ് മമ്മൂട്ടി. ഇപ്പോൾ ഷൂട്ടിംഗ് പുരോഗമിക്കുന്ന ഗാനഗന്ധർവൻ സെപ്റ്റംബർ അവസാന വാരത്തോടെ റിലീസ് ചെയ്യും എന്നാണ് റിപ്പോർട്ടുകൾ പറയുന്നത്. കലാസദൻ ഉല്ലാസ് എന്ന ഒരു ഗാനമേള ഗായകൻ ആയാണ് മമ്മൂട്ടി ഈ ചിത്രത്തിൽ അഭിനയിക്കുന്നത്. രമേഷ് പിഷാരടിയും ഹരി .പി നായരും ചേർന്ന് കഥയും തിരക്കഥയും സംഭാഷണവും ഒരുക്കിയിരിക്കുന്ന ഈ ചിത്രത്തിൽ മുകേഷ്, ഇന്നസെന്റ്, സിദ്ധിഖ്, സലിം കുമാർ, ധർമജൻ ബോൾഗാട്ടി, ഹരീഷ് കണാരൻ, സുരേഷ് കൃഷ്ണ, മണിയൻ പിള്ള രാജു, കുഞ്ചൻ, അശോകൻ, സുനിൽ സുഖദ , അതുല്യ, ശാന്തി പ്രിയ തുടങ്ങിയവരും പ്രധാന വേഷങ്ങളിൽ അഭിനയിക്കുന്നു. ഇച്ചായീസ് പ്രൊഡക്ഷൻസും രമേഷ് പിഷാരടി എന്റർടൈൻമെൻറ്സും ചേർന്ന് നിർമ്മിക്കുന്ന ഈ ചിത്രത്തിന് ക്യാമറ ചലിപ്പിക്കുന്നത് അഴകപ്പനും സംഗീതം ഒരുക്കുന്നത് ദീപക് ദേവുമാണ്.
