മെഗാ സ്റ്റാർ മമ്മൂട്ടിയുടെ കരിയറിലെ തന്നെ ഏറ്റവും വലിയ ഹിറ്റ് ആണ് വൈശാഖ് സംവിധാനം ചെയ്ത മധുര രാജ. ഈ വർഷം വിഷു റീലീസ് ആയെത്തിയ ഈ ചിത്രം നൂറു കോടി രൂപയുടെ ടോട്ടൽ ബിസിനസ് നടത്തി എന്നാണ് അണിയറ പ്രവർത്തകർ അറിയിച്ചത്. ഉദയ കൃഷ്ണ തിരക്കഥ രചിച്ചു നെൽസൻ ഐപ്പ് നിർമ്മിച്ച ഈ മാസ്സ് മസാല എന്റർടൈന്മെന്റ് മൂവി ഇപ്പോൾ തമിഴിലേക്കും ഡബ്ബ് ചെയ്ത് റിലീസ് ചെയ്യുകയാണ്. മമ്മൂട്ടിയോടൊപ്പം തമിഴ് യുവ താരം ജയ് കൂടി ചിത്രത്തിൽ ഉള്ളത് തമിഴ് പതിപ്പിന് ഗുണം ചെയ്യും എന്ന വിശ്വാസത്തിൽ ആണ് അണിയറ പ്രവർത്തകർ.
ഈ വരുന്ന ഒക്ടോബർ 18 നു ആണ് മധുരരാജയുടെ തമിഴ് പതിപ്പ് റിലീസ് ചെയ്യാൻ പോകുന്നത്. മമ്മൂട്ടി, ജയ് എന്നിവർക്ക് ഒപ്പം തെലുങ്ക് നടൻ ജഗപതി ബാബു, അനുശ്രീ, മഹിമ നമ്പ്യാർ, സലിം കുമാർ, പ്രശാന്ത് അലക്സാണ്ടർ, സിദ്ദിഖ്, നെടുമുടി വേണു, വിജയ രാഘവൻ, ഷംന കാസിം, നോബി, അന്നാ രാജൻ, നരേൻ തുടങ്ങി ഒരു വലിയ താര നിര തന്നെ ഈ ചിത്രത്തിൽ ഉണ്ട്. ഗോപി സുന്ദർ സംഗീതം ഒരുക്കിയ ഈ ചിത്രത്തിൽ ഒരു ഐറ്റം നമ്പറുമായി എത്തിയിരിക്കുന്നത് ബോളിവുഡ് താര സുന്ദരിയായ സണ്ണി ലിയോണി ആണ്. പുലി മുരുകൻ എന്ന ഇൻഡസ്ട്രി ഹിറ്റായ മോഹൻലാൽ ചിത്രത്തിന് ശേഷം വൈശാഖ്- ഉദയ കൃഷ്ണ ടീം ഒന്നിച്ച ചിത്രമായിരുന്നു മധുര രാജ. വൈശാഖിന്റെ ആദ്യ ചിത്രമായ പോക്കിരി രാജയുടെ രണ്ടാം ഭാഗം ആണ് ഈ ചിത്രം.
