ഈ വർഷം റിലീസ് ചെയ്ത മലയാള ചിത്രങ്ങളിൽ വമ്പൻ വിജയം നേടിയ ഒന്നാണ് ടോവിനോ തോമസ് നായകനായി എത്തിയ തല്ലുമാല. അനുരാഗ കരിക്കിൻ വെള്ളം, ഉണ്ട എന്നീ ചിത്രങ്ങൾക്ക് ശേഷം ഖാലിദ് റഹ്മാൻ സംവിധാനം ചെയ്ത ഈ ചിത്രം നിർമ്മിച്ചത് ആഷിക് ഉസ്മാനാണ്. ടോവിനോയുടെ കരിയറിലെ തന്നെ ഏറ്റവും വലിയ ഹിറ്റായി മാറിയ തല്ലുമാല ആഗോള കളക്ഷനായി 47 കോടിയോളമാണ് നേടിയെടുത്തത്. ഏകദേശം എഴുപതോളം കോടി രൂപയുടെ ആകെ മൊത്തമുള്ള ബിസിനസ്സാണ് ഈ ചിത്രം നടത്തിയതെന്നും റിപ്പോർട്ടുകൾ വന്നിരുന്നു. ഇപ്പോഴിതാ തല്ലുമാലക്ക് ശേഷം ഖാലിദ് റഹ്മാൻ- ആഷിക് ഉസ്മാൻ ടീം വീണ്ടുമൊരു ചിത്രത്തിനായി ഒന്നിക്കുകയാണ്. തങ്ങൾ വീണ്ടും ഒന്നിക്കുകയാണെന്ന വിവരം ആഷിക് ഉസ്മാൻ തന്നെയാണ് പുറത്ത് വിട്ടത്. അടുത്ത വർഷം പകുതിയോടെയാവും ഈ ചിത്രം ആരംഭിക്കുകയെന്നും വാർത്തകൾ വന്നിരുന്നു.
ഇതിന്റെ മറ്റു വിവരങ്ങളൊന്നും ഒഫീഷ്യലായി പുറത്ത് വിട്ടിട്ടില്ലെങ്കിലും സോഷ്യൽ മീഡിയയിൽ പ്രചരിക്കുന്ന വാർത്തകൾ പ്രകാരം, വമ്പൻ താരനിരയാണ് ഈ ചിത്രത്തിൽ അണിനിരക്കുക. ദുൽഖർ സൽമാൻ, ആസിഫ് അലി, കുഞ്ചാക്കോ ബോബൻ എന്നിവർ ഒരുമിച്ചെത്തുന്ന ഒരു ബിഗ് ബഡ്ജറ്റ് മൾട്ടി സ്റ്റാർ ചിത്രമായിരിക്കും ഖാലിദ് റഹ്മാൻ ഒരുക്കുകയെന്നാണ് സോഷ്യൽ മീഡിയയിൽ പരക്കുന്ന വാർത്തകൾ പറയുന്നത്. ഈ വാർത്ത സത്യമാവണേ എന്ന പ്രാർത്ഥനയിലാണ് മേൽപ്പറഞ്ഞ താരങ്ങളുടെ ആരാധകരും സിനിമാ പ്രേമികളും. ആക്ഷനും പ്രണയവും കോമെഡിയും സംഗീതവും കോർത്തിണക്കിയൊരുക്കിയ ഒരു പക്കാ മാസ്സ് എന്റർടൈനറായിരുന്നു ഖാലിദ് റഹ്മാന്റെ തല്ലുമാല. അതുപോലെ ഒരു ഫുൾ ഓൺ എന്റർടൈനറാണ് പ്രേക്ഷകർ ഒരിക്കൽ കൂടി പ്രതീക്ഷിക്കുന്നതും.
