മലയാള സിനിമയിലെ ഒരു പുതിയ ചരിത്രം തന്നെയായി മാറാനുള്ള തയ്യാറെടുപ്പിലാണ് റോഷൻ ആൻഡ്രൂസിന്റെ നിവിൻ പോളി ചിത്രം കായംകുളം കൊച്ചുണ്ണി. വലിയ ബഡ്ജറ്റിൽ ഒരുങ്ങുന്ന ഈ ചിത്രത്തിൽ ഇന്ത്യൻ സിനിമയിലെ പ്രഗത്ഭർ ഒരുമിക്കുന്നതായി ആണ് വാർത്തകൾ വന്നു കൊണ്ടിരിക്കുന്നത്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ നിർമ്മിക്കുന്ന ഈ ചിത്രത്തിന് വേണ്ടി കാമറ ചലിപ്പിക്കുന്നത് ബോളിവുഡ് ക്യാമറാമാൻ ആയ ബിനോദ് പ്രധാൻ ആണ്. ഗോപി സുന്ദർ സംഗീതം പകരുന്ന ഈ ചിത്രത്തിന് വേണ്ടി സൗണ്ട് ഡിസൈനിംഗ് ചെയ്യാൻ പോകുന്നത് ബാഹുബലിയിലൂടെ പ്രശസ്തനായ സതീഷ് ആണെന്നണ് പുതിയ റിപ്പോർട്ടുകൾ സൂചിപ്പിക്കുന്നതു. ഒരു കാലഘട്ടം മുഴുവൻ പുനരാവിഷ്കരിക്കുന്ന ഈ ചിത്രത്തിൽ സതീഷിന്റെ സൗണ്ട് ഡിസൈനിങ് കൂടി ചേരുമ്പോൾ ഉണ്ടാകാൻ പോകുന്ന ഇമ്പാക്ട് വളരെ വലുതായിരിക്കും എന്നുറപ്പാണ്.
നിവിൻ പോളിയുടെ നായികയായി ഈ ചിത്രത്തിലെത്തുന്നത് അമൽ പോൾ ആണ്. ഈ വരുന്ന സെപ്റ്റംബർ ഒന്ന് മുതൽ ചിത്രീകരണം ആരംഭിക്കാൻ പോകുന്ന ഈ ചിത്രത്തിന് വേണ്ടി പുതുമുഖ അഭിനേതാക്കളെയും ക്ഷണിച്ചിട്ടുണ്ട്. ശ്രീലങ്ക, എറണാകുളം, ഉഡുപ്പി എന്നിവിടങ്ങളിലായി പൂർത്തിയാക്കാൻ ഉദ്ദേശിക്കുന്ന ഈ ചിത്രം 2018 ഏപ്രിലിൽ തിയേറ്ററിൽ എത്തിക്കാനാണ് ശ്രമം.
നിവിൻ പോളി ഈ ചിത്രത്തിന് വേണ്ടിയുള്ള തയ്യാറെടുപ്പിന്റെ ഭാഗമായി കുറച്ചു കാലം കളരി പയറ്റ് അഭ്യസിച്ചു എന്നാണ് വാർത്തകൾ വരുന്നത്. ബോബി- സഞ്ജയ് ടീം തിരക്കഥ ഒരുക്കുന്ന ഈ ചിത്രം അനൗൺസ് ചെയ്തിട്ടു ഇപ്പോൾ ഒന്നര വർഷത്തിലേറെയായി. റോഷൻ ആൻഡ്രൂസ് അവസാനമായി സംവിധാനം ചെയ്ത ചിത്രം ബോബി- സഞ്ജയ് ടീം തന്നെ തിരക്കഥയൊരുക്കിയ കുഞ്ചാക്കോ ബോബൻ നായകനായ സ്കൂൾ ബസ് ആണ്.
