അർഹതയുടേ അംഗീകാരം ആണ് ഇപ്പോൾ കാർത്തി ചിത്രമായ കൈദിയെ തേടി വന്നിരിക്കുന്നത്. ലോകേഷ് കനകരാജ് എഴുതി സംവിധാനം ചെയ്ത ഈ ത്രില്ലർ ചിത്രം അതിന്റെ പ്രമേയം കൊണ്ടും മേക്കിങ് സ്റ്റൈൽ കൊണ്ടും അഭിനേതാക്കളുടെ പ്രകടനം കൊണ്ടുമെല്ലാം പ്രേക്ഷകരുടേയും നിരൂപകരുടേയും കൈയടി ഒരുപോലെ വാങ്ങി കൂട്ടിയിരുന്നു. ഇപ്പോഴിതാ ബോക്സ് ഓഫീസിലും വമ്പൻ വിജയമാണ് ഈ ചിത്രം നേടുന്നത്. ആദ്യ എട്ടു ദിവസം കൊണ്ട് തന്നെ ആഗോള കളക്ഷൻ ആയി അമ്പതു കോടിയിൽ അധികം നേടി കഴിഞ്ഞു ഈ ചിത്രം.
കാർത്തിയുടെ കരിയറിലെ ഏറ്റവും മികച്ച പ്രകടനങ്ങളിൽ ഒന്നാണ് അദ്ദേഹം ഈ ചിത്രത്തിൽ കാഴ്ച വെച്ചിരിക്കുന്നത്. ആ ചിത്രം ബോക്സ് ഓഫീസിലും അദ്ദേഹത്തിന്റെ കരിയറിലെ മികച്ച വിജയങ്ങളിൽ ഒന്നായി മാറുമ്പോൾ കാർത്തി എന്ന നടന് ഇത് ഇരട്ടി സന്തോഷമാണ് നൽകുന്നത്. കാർത്തിക്കൊപ്പം മലയാള നടൻ നരേനും ഗംഭീര പ്രകടനം കാഴ്ച വെച്ച ഈ ചിത്രം പതിവ് തമിഴ് സിനിമയുടെ മസാല കൂട്ടുകൾ ആയ പാട്ടുകളും നായികയും ഒന്നുമില്ലാതെ ആണ് ഒരുക്കിയിരിക്കുന്നത് എന്നതും ഈ വിജയത്തിന്റെ മാറ്റു കൂട്ടുന്നു.
മികച്ച അഭിപ്രായം നേടിയ വിജയ് ചിത്രം ബിഗിൽ ഒപ്പം ഉണ്ടായിട്ടു പോലും കൈദി ഇപ്പോൾ വമ്പൻ ബോക്സ് ഓഫീസ് മുന്നേറ്റം ആണ് നടത്തുന്നത്. ഈ ചിത്രത്തിന് ഒരു രണ്ടാം ഭാഗം ഉണ്ടാകും എന്നും സംവിധായകൻ സ്ഥിതീകരിച്ചിട്ടുണ്ട്. കേരളത്തിലും വമ്പൻ വിജയം നേടുന്ന ഈ ചിത്രം ഇപ്പോൾ രണ്ടാം വാരത്തിലേക്കു പ്രവേശിച്ചപ്പോൾ എല്ലായിടത്തും കൂടുതൽ ഷോകൾ കൂട്ടിച്ചേർക്കുകയാണ്. ഒരു ചെറിയ ചിത്രത്തിന്റെ വമ്പൻ വിജയം എന്ന് കൈദി നേടുന്ന ഈ വിജയത്തെ നമ്മുക്ക് വിശേഷിപ്പിക്കാം. ഡ്രീം വാരിയർ പിക്ചേഴ്സിന്റെ ബാനറിൽ പ്രകാശ്ബാബു, പ്രഭു, വിവേക് എന്നിവർ ചേർന്ന് നിർമ്മിച്ചിരിക്കുന്ന കൈദിക്കു വേണ്ടി ക്യാമറ ചലിപ്പിച്ചത് സത്യൻ സൂര്യൻ ആണ്. സാം സി എസ് സംഗീത സംവിധാനം നിർവഹിച്ച ഈ ചിത്രത്തിന്റെ എഡിറ്റിംഗ് നിർവഹിച്ചിരിക്കുന്നതു ഫിലോമിൻ രാജ് ആണ്. പൂർണ്ണമായും രാത്രിയാണ് ചിത്രീകരിച്ചിരിക്കുന്നത് എന്നതും കൈദിയുടെ പ്രത്യേകതയാണ്.
