ഉലക നായകൻ കമൽ ഹാസൻ നായകനായി എത്തിയ ഏറ്റവും പുതിയ ചിത്രമായ വിക്രം ഇപ്പോഴും ബോക്സ് ഓഫീസിൽ വമ്പൻ കുതിപ്പ് തുടരുകയാണ്. ആഗോള കളക്ഷൻ 400 കോടിയിലേക്കു കുതിക്കുന്ന ഈ ചിത്രം വൈകാതെ ഒടിടി റിലീസായുമെത്തുമെന്നുള്ള റിപ്പോർട്ടുകളാണ് ഇപ്പോൾ വരുന്നത്. അടുത്ത മാസം എട്ടിനാവും ഈ ചിത്രം ഒടിടി റിലീസായി വരുന്നതെന്നും ഡിസ്‌നി പ്ലസ് ഹോട്ട് സ്റ്റാറിലാണ് വിക്രം ജൂലൈ എട്ടു മുതൽ സ്ട്രീം ചെയ്തു തുടങ്ങുകയെന്നും വിവരങ്ങൾ സൂചിപ്പിക്കുന്നു. റെക്കോർഡ് തുകയ്ക്കാണ് ഈ ചിത്രത്തിന്റെ ഒടിടി സ്ട്രീമിങ് അവകാശം ഡിസ്‌നി പ്ലസ് ഹോട്ട് സ്റ്റാർ ടീം വാങ്ങിയതെന്ന് നേരത്തെ തന്നെ വാർത്തകൾ വന്നിരുന്നു. 130 കോടിയോളമാണ് ഇതിന് ഒടിടി റൈറ്റ്‌സായി ലഭിച്ചതെന്നും വാർത്തകൾ പറയുന്നു. ഏതായാലും തീയേറ്ററുകൾക്കു ശേഷം ഒടിടി പ്ലാറ്റ്‌ഫോമിലൂടെയും സൂപ്പർ വിജയം നേടാനുള്ള തയ്യാറെടുപ്പിലാണ് ഉലക നായകൻ.
സൂപ്പർ ഹിറ്റ് സംവിധായകൻ ലോകേഷ് കനകരാജ് സംവിധാനം ചെയ്ത വിക്രം ലോകേഷ് സിനിമാറ്റിക് യൂണിവേഴ്സിന്റെ കൂടി ഭാഗമാണ്. കൈതി, വിക്രം, വിക്രം 3, കൈതി 2 എന്നിവയുൾപ്പെടുന്നതാണ് ഇപ്പോൾ ലോകേഷ് സിനിമാറ്റിക് യൂണിവേഴ്‌സ്. കൈതി 2, വിക്രം 3 എന്നിവ ഇനി വരാനുള്ള ലോകേഷ് പ്രൊജെക്ടുകളാണ്. ലോകേഷും രത്‌നകുമാറും ചേർന്ന് രചിച്ച വിക്രം നിർമ്മിച്ചതും കമൽ ഹാസൻ തന്നെയാണ്. രാജ് കമൽ ഫിലിംസ് ഇന്റർനാഷനലിന്റെ ബാനറിൽ അദ്ദേഹം നിർമ്മിച്ച ഈ ചിത്രത്തിൽ മക്കൾ സെൽവൻ വിജയ് സേതുപതി, ഫഹദ് ഫാസിൽ, സൂര്യ എന്നിവരും അഭിനയിച്ചിട്ടുണ്ട്. അനിരുദ്ധ് രവിചന്ദറാണ് ഈ ചിത്രത്തിന്റെ സംഗീത സംവിധായകൻ.
