ദളപതി വിജയ്‌യെ നായകനാക്കി ലോകേഷ് കനകരാജ് ഒരുക്കാൻ പോകുന്ന പുതിയ ചിത്രമാണ് ദളപതി67. ഈ ചിത്രത്തിന്റെ കൂടുതൽ വിവരങ്ങൾ ഡിസംബർ മാസത്തിൽ പുറത്ത് വരുമെന്ന പ്രതീക്ഷയിലാണ് ആരാധകരും സിനിമ പ്രേമികളും. ഡിസംബറിൽ ഷൂട്ടിംഗ് ആരംഭിക്കുന്ന ഈ ചിത്രം 170 ദിവസത്തോളമാണ് ഷൂട്ട് ചെയ്യുക എന്നും അടുത്ത വർഷം ദീപാവലി റിലീസായാണ് ഈ ചിത്രം എത്തുകയെന്നുമാണ് സൂചന. സെവെൻ സ്ക്രീൻ സ്റ്റുഡിയോസ് നിർമ്മിക്കാൻ പോകുന്ന ഈ ചിത്രം ഒരു പക്കാ ആക്ഷൻ ചിത്രമായിരിക്കുമെന്നും ലോകേഷ് പറഞ്ഞിരുന്നു. ഇപ്പോഴിതാ ഈ ചിത്രത്തിന്റെ താരനിരയുമായി ബന്ധപ്പെട്ട ഒരു വാർത്തയാണ് സോഷ്യൽ മീഡിയയിൽ പ്രചരിക്കുന്നത്. ഉലകനായകൻ കമൽ ഹാസൻ ഈ ചിത്രത്തിൽ അതിഥി വേഷത്തിൽ എത്തിയേക്കുമെന്നാണ് ആ വാർത്തകൾ പറയുന്നത്. മാത്രമല്ല, രാജ്കമൽ ഫിലിംസ് ഇന്റർനാഷനലിന്റെ ബാനറിൽ ഈ ചിത്രത്തിന്റെ സഹനിർമ്മാതാവായി കമൽ ഹാസൻ വന്നേക്കാം എന്ന വാർത്തകളും വരുന്നുണ്ട്.
ലോകേഷ് കനകരാജ് ഒരുക്കിയ വിക്രം എന്ന ഇൻഡസ്ട്രി ഹിറ്റ് ചിത്രം നിർമ്മിച്ചതും അതിൽ നായകനായി അഭിനയിച്ചതും കമൽ ഹാസനായിരുന്നു. അതിലൂടെ ഒരു ലോകേഷ് സിനിമാറ്റിക് യൂണിവേഴ്സും അദ്ദേഹം സൃഷ്ടിച്ചു. ലോകേഷിന്റെ മുൻ ചിത്രമായ കൈതിയിലെ കഥാപാത്രങ്ങളെ കൂടെ ചേർത്താണ് വിക്രത്തിന്റെ കഥ വികസിപ്പിച്ചത്. വിക്രത്തിൽ സൂര്യ അതിഥി വേഷം കൂടി ചെയ്തതോടെ, കാർത്തി, കമൽ ഹാസൻ, സൂര്യ, ഫഹദ് ഫാസിൽ, വിജയ് സേതുപതി എന്നിവരൊക്കെ ഉൾപ്പെട്ട ഒരു ലോകേഷ് സിനിമാറ്റിക് യൂണിവേഴ്‌സ് ഉണ്ടായിക്കഴിഞ്ഞു. ഇനി വരാൻ പോകുന്ന വിജയ് ചിത്രവും അതിന്റെ ഭാഗമാകുമോ എന്നറിയാനുള്ള ആകാംക്ഷയിലാണ് പ്രേക്ഷകർ. മാസ്റ്റർ എന്ന ചിത്രത്തിലൂടെയാണ് വിജയ്- ലോകേഷ് ടീം ആദ്യമായി ഒന്നിച്ചത്.
