അന്തരിച്ച നടി കല്‍പ്പനയുടെ മകള്‍ ശ്രീമയി സിനിമയിലേക്ക്. ‘കുഞ്ചിയമ്മയും അഞ്ചു മക്കളും’ എന്ന ചിത്രത്തിലൂടെയാണ് ശ്രീമയി നായികയായെത്തുന്നത്. സിനിമയിൽ ശ്രീസംഘ്യ എന്ന പേരിലായിരിക്കും ശ്രീമയി അറിയപ്പെടുക. അമ്മയ്ക്കു കൊടുത്ത സ്നേഹവും അനുഗ്രഹവും എനിക്കും നിങ്ങൾ നൽകണമെന്ന അഭ്യർത്ഥനയോടെയാണ് ശ്രീസംഘ്യ മലയാളസിനിമയിലേക്ക് വരുന്നത്.
ശ്രീസംഘ്യ എന്ന് പേര് മാറ്റാനുള്ള കാരണവും ശ്രീമയി വ്യക്തമാക്കുന്നു. ശ്രീമയി നല്ല പേരാണ്. എന്നാൽ ഇത്തിരി വൈബ്രേഷൻ കുറവാണ്. അമ്മയുടെ അമ്മയ്ക്ക് ന്യൂമറോളജി അറിയാം.പുരാണത്തിൽ സൂര്യഭഗവാന്റെ ഭാര്യയുടെ പേരായ സംഘ്യ ന്യൂമറോളജി പ്രകാരം തെരഞ്ഞെടുക്കാൻ തീരുമാനിക്കുകയായിരുന്നുവെന്നും ശ്രീസംഘ്യ പറയുന്നു. ഹാസ്യ കഥാപാത്രങ്ങളെക്കാൾ നായിക കഥാപാത്രങ്ങൾ അവതരിപ്പിക്കാനാണ് ഇഷ്ടപ്പെടുന്നതെന്നും ചാര്‍ളി, ബാംഗ്ലൂര്‍ ഡേയ്‌സ്, തമിഴിലെ സതിലീലാവതി എന്ന് തുടങ്ങി അമ്മയുടെ ഒട്ടേറെ സിനിമകള്‍ ഇഷ്ടമാണെന്നും ശ്രീസംഘ്യ കൂട്ടിച്ചേര്‍ത്തു. ചെന്നൈ എസ്ആര്‍എം സര്‍വ്വകലാശാലയില്‍ വിഷ്വല്‍ കമ്മ്യൂണിക്കേഷന്‍ ഒന്നാം വര്‍ഷ വിദ്യാര്‍ത്ഥിനിയാണ് ശ്രീസംഘ്യ.
സംവിധായകൻ കമലിന്റെ അസോസിയേറ്റായിരുന്ന സുമേഷ് ലാൽ ആദ്യമായി സംവിധാനം ചെയ്യുന്ന ചിത്രമാണ് കുഞ്ചിയമ്മയും അഞ്ചു മക്കളും. തന്റേടിയായ ഒരു കഥാപാത്രമാണ് കുഞ്ചിയമ്മ. അഞ്ചു മക്കളായി കലാഭവൻ ഷാജോൺ, ഇർഷാദ്, ശ്രീജിത്ത് രവി, സാജു നവോദയ, ബിനു പപ്പു എന്നിവരാണ് അഭിനയിക്കുന്നത്.
