കംപ്ലീറ്റ് ആക്ടര്‍ മോഹന്‍ലാലിനെ നായകനാക്കി ഏഴു വര്‍ഷം മുന്‍പ് മാസ്റ്റര്‍ ഡയറക്ടര്‍ ജോഷി ഒരുക്കിയ ചിത്രമാണ്‌ റണ്‍ ബേബി റണ്‍. ബ്ലോക്ക്ബസ്റ്റർ വിജയം നേടിയ ഈ ചിത്രം രചിച്ചത് സച്ചി ആയിരുന്നു. മീഡിയയുടെ പശ്ചാത്തലത്തില്‍ കഥ പറഞ്ഞ ഈ ചിത്രത്തിന് ശേഷം ഒരിക്കല്‍ കൂടി മീഡിയ കഥാ പശ്ചാത്തലമാക്കി ജോഷി ഒരുക്കുന്ന ചിത്രമാണ്‌ ഓണ്‍ എയര്‍. അടുത്ത വര്‍ഷം ഷൂട്ടിംഗ് ആരംഭിക്കുന്ന ഈ ചിത്രത്തില്‍ നായകനായി എത്തുന്നത്‌ ദിലീപ് ആണ്. സൈന്യം, റണ്‍വേ, ലയണ്‍, ജൂലൈ 4 , ട്വന്റി ട്വന്റി, ക്രിസ്ത്യൻ ബ്രദേഴ്‌സ്, അവതാരം എന്നീ ചിത്രങ്ങള്‍ക്ക് ശേഷം ദിലീപ് ജോഷിയുടെ സംവിധാനത്തിൽ അഭിനയിക്കാൻ പോകുന്ന ഈ ചിത്രത്തിന് തിരക്കഥ ഒരുക്കുന്നത് നവാഗതരായ നിരന്ജനും അരുണും ആണ്. ദിലീപ് ഒരു മാധ്യമ പ്രവര്‍ത്തകന്റെ വേഷത്തില്‍ എത്തുന്ന ഈ ചിത്രം നിര്‍മ്മിക്കാന്‍ പോകുന്നത് ജാഫേഴ്‌സ് പ്രൊഡക്ഷൻസിന്റെ ബാനറിൽ സജിൻ ജാഫർ ആണ്.
ഇപ്പോൾ ഈ ചിത്രത്തിന്റെ താര നിർണ്ണയം നടന്നു വരികയാണ്. അടുത്ത വർഷം ജനുവരി അവസാനത്തോടെ ഈ ദിലീപ് ചിത്രം തുടങ്ങാൻ ആണ് ജോഷിയുടെ തീരുമാനം എന്നറിയുന്നു. ഇപ്പോൾ സുഗീതിന്റെ മൈ സാന്റാ പൂർത്തിയാക്കുകയാണ് ദിലീപ്. ക്രിസ്മസ് റിലീസ് ആയി എത്തുന്ന ഈ ചിത്രത്തിന് ശേഷം നാദിർഷ ഒരുക്കുന്ന കേശു ഈ വീടിന്റെ നാഥൻ എന്ന ചിത്രത്തിലാണ് ദിലീപ് അഭിനയിക്കുക. ഉർവശി നായികാ വേഷത്തിൽ എത്തുന്ന ഈ ചിത്രം ദിലീപും നാദിർഷായും ചേർന്നാണ് നിർമ്മിക്കുന്നതും. സജീവ് പാഴൂർ ആണ് ഈ ചിത്രത്തിന്റെ തിരക്കഥ രചിക്കുന്നത്.
