രാജാധിരാജ, മാസ്റ്റർ പീസ് എന്നീ ചിത്രങ്ങൾക്ക് ശേഷം സംവിധായകൻ അജയ് വാസുദേവ് ഒരുക്കിയ പുതിയ ചിത്രമാണ് ഷൈലോക്ക്, തന്റെ മൂന്നാമത്തെ ചിത്രത്തിലും അജയ് നായകനാക്കിയത് മെഗാ സ്റ്റാർ മമ്മൂട്ടിയെ ആണ്. കസബ, അബ്രഹാമിന്റെ സന്തതികൾ എന്നീ ചിത്രങ്ങൾക്ക് ശേഷം ഗുഡ് വിൽ എന്റർടൈൻമെൻറ്സിന്റെ ബാനറിൽ ജോബി ജോർജ് മമ്മൂട്ടിയെ നായകനാക്കി നിർമ്മിച്ച ചിത്രം എന്ന പ്രത്യേകതയും ഷൈലോക്കിനു ഉണ്ട്. നവാഗതരായ ബിബിൻ മോഹൻ, അനീഷ് ഹമീദ് എന്നിവർ ചേർന്ന് രചിച്ച ഈ ചിത്രം ഒരു മാസ്സ് മസാല എന്റെർറ്റൈനെർ ആയാണ് ഒരുക്കിയിരിക്കുന്നത്. പതിവുപോലെ തന്നെ തന്റെ ചിത്രത്തിൽ പൂർണ്ണമായ വിശ്വാസം കാണിക്കുകയാണ് നിർമ്മാതാവ് ജോബി ജോർജ്. ഷൈലോക്ക് പൊളിക്കുമോ ചേട്ടാ എന്ന മമ്മൂട്ടി ആരാധകന്റെ ചോദ്യത്തിന് ജോബി ജോർജ് നൽകിയ മറുപടി ആരാധകരിൽ ആവേശം ഇരട്ടിയാക്കി കഴിഞ്ഞു.
പൊളിക്കുമോ എന്ന വാചകത്തിന്റെ യഥാർത്ഥ അർഥം ഷൈലോക്ക് ആയിരിക്കും എന്നാണ് അദ്ദേഹം പറഞ്ഞ മറുപടി. ഇതിനു മുൻപ് ക്രിസ്മസ് റിലീസ് ആയിരുന്ന ഷൈലോക്ക് മാമാങ്കത്തിന് വേണ്ടി തീയതി മാറ്റിയപ്പോഴും ജോബി ജോർജ് പറഞ്ഞത് ഷൈലോക്ക് തീയേറ്ററുകളിൽ എത്തുന്ന ദിവസം ആയിരിക്കും ആരാധകർക്ക് ഓണവും വിഷുവും ക്രിസ്മസും ഒക്കെ എന്നാണ്. എന്തായാലും ഒരു ഗംഭീര വിനോദ ചിത്രം തന്നെയായിരിക്കും ഷൈലോക്ക് എന്ന പ്രതീക്ഷയിൽ ആണ് മമ്മൂട്ടി ആരാധകർ. ഈ മാസം ഇരുപത്തിമൂന്നാം തീയതി ആണ് ഷൈലോക്ക് റിലീസ് ചെയ്യാൻ പോകുന്നത്. മമ്മൂട്ടിയോടൊപ്പം രാജ് കിരൺ, മീന എന്നിവരും പ്രധാന വേഷങ്ങൾ ചെയ്ത ഈ ചിത്രത്തിന്റെ രണ്ടു ടീസറുകളും ഇതുവരെ റിലീസ് ചെയ്ത പോസ്റ്ററുകളും സോഷ്യൽ മീഡിയയിൽ ഹിറ്റാണ്.
