ദൃശ്യത്തിന് ശേഷം കംപ്ലീറ്റ് ആക്ടർ മോഹൻലാലിനെ നായകനാക്കി ജീത്തു ജോസഫ് ഒരുക്കുന്ന ചിത്രമാണ് റാം. ജനുവരിയിൽ ഷൂട്ടിംഗ് ആരംഭിച്ച ഈ ചിത്രത്തിന്റെ കേരളാ, ധനുഷ്‌കോടി, ഡൽഹി ഷെഡ്യൂളുകൾ ഇപ്പോൾ പൂർത്തിയായി കഴിഞ്ഞു. ഇനി ലണ്ടനിൽ ആണ് ഈ ചിത്രത്തിന്റെ അടുത്ത ഷെഡ്യൂൾ ഷൂട്ട് ചെയ്യുക. ജീത്തു ജോസഫ് തന്നെ തിരക്കഥ ഒരുക്കിയ ഈ ചിത്രം ഒരു റിയലിസ്റ്റിക് മാസ്സ് ത്രില്ലർ ആണെന്നാണ് അദ്ദേഹം പറയുന്നത്. മോഹൻലാൽ എന്ന നടനേയും താരത്തെയും ഉപയോഗിക്കുന്ന ഈ ചിത്രം എന്നാൽ പുലി മുരുകനോ ലൂസിഫെറോ പോലത്തെ ഒരു അതിമാനുഷ കഥാപാത്രത്തിന്റെ കഥ പറയുന്ന മാസ്സ് ചിത്രമല്ല എന്നും ജീത്തു ജോസഫ് പറയുന്നു. ദി ക്യൂ ചാനലിന് വേണ്ടി മനീഷ് നാരായണൻ നടത്തിയ അഭിമുഖത്തിലാണ് ഈ കാര്യം ജീത്തു ജോസഫ് വെളിപ്പെടുത്തുന്നത്. ഒരു റിയലിസ്റ്റിക് ശൈലിയിൽ കഥ പറഞ്ഞുകൊണ്ട് പ്രേക്ഷകരെ രസിപ്പിച്ചു, ത്രില്ലടിപ്പിച്ചു മുന്നോട്ടു കൊണ്ട് പോകാനാണ് തന്റെ ശ്രമമെന്നും ജീത്തു ജോസഫ് വിശദീകരിക്കുന്നു.
ഈ ചിത്രത്തിൽ മോഹൻലാലിന്റെ നായികാ വേഷം ചെയ്യുന്നത് തെന്നിന്ത്യൻ താര സുന്ദരി തൃഷയാണ്. ഹേ ജൂഡ് എന്ന നിവിൻ പോളി- ശ്യാമ പ്രസാദ് ചിത്രത്തിന് ശേഷം തൃഷ അഭിനയിക്കുന്ന മലയാള ചിത്രമാണ് റാം. അഭിഷേക് ഫിലിംസ് നിർമ്മിക്കുന്ന ഈ ബിഗ് ബഡ്ജറ്റ് ചിത്രത്തിൽ മോഹൻലാലിന്റെ ഭാര്യ വേഷത്തിലാണ് തൃഷ അഭിനയിക്കുന്നത്. ഇന്ദ്രജിത് സുകുമാരൻ, ആദിൽ ഹുസൈൻ, കലാഭവൻ ഷാജോൺ, സിദ്ദിഖ്, സായി കുമാർ, ലിയോണ ലിഷോയ്, ദുർഗാ കൃഷ്ണ, ചന്ദുനാഥ്, ആനന്ദ് മഹാദേവൻ, സന്തോഷ് കീഴാറ്റൂർ എന്നിവരുമഭിനയിക്കുന്ന ഈ ചിത്രത്തിന് ദൃശ്യങ്ങളൊരുക്കുന്നതു സതീഷ് കുറുപ്പാണ്. വി എസ് വിനായക് എഡിറ്റ് ചെയ്യുന്ന റാമിന് സംഗീതമൊരുക്കുന്നത് വിഷ്ണു ശ്യാമാണ്.
