ഹാസ്യതാരം രമേഷ് പിഷാരടി ആദ്യമായി സംവിധാനം ചെയ്ത് പുറത്തിറങ്ങിയ പഞ്ചവർണ്ണതത്ത, വലിയ പ്രകടനം നടത്തി മുന്നേറുന്ന വാർത്തകളാണ് പുറത്തുവന്നുകൊണ്ടിരിക്കുന്നത്. ജയറാമിനെയും കുഞ്ചാക്കോ ബോബനെയും നായകന്മാരാക്കി രമേഷ് പിഷാരടി ഒരുക്കിയ ചിത്രം വിഷു റിലീസ് ആയാണ് തിയേറ്ററുകളിലെത്തിയത്. ചിത്രം ഇതിനോടകം തന്നെ വമ്പൻ കളക്ഷൻ നേടി കഴിഞ്ഞു എന്നാണ് അറിയുന്നത്. മികച്ച പ്രതികരണം വന്ന ചിത്രം 11 കോടിയോളം കളക്ട് ചെയ്തത് വലിയ ഹിറ്റായി മാറിക്കൊണ്ടിരിക്കുന്ന കാഴ്ചയാണ് കാണാൻ കഴിയുന്നത്. കുടുംബ പ്രേക്ഷകരും ചിത്രം ഏറ്റെടുത്തതോടെ കൂടിയാണ് ഇത്ര വലിയ വിജയം ചിത്രത്തിന് ഉണ്ടായത്. റിലീസ് ചെയ്ത ഭൂരിഭാഗം തിയറ്ററുകളിലും ചിത്രം മികച്ച പ്രകടനമാണ് നടത്തിക്കൊണ്ടിരിക്കുന്നത്. റിലീസിന് മുമ്പുതന്നെ ട്രെയിലറുകളും പാട്ടുകളും എല്ലാം വലിയ ഹിറ്റായി മാറിയ ചിത്രത്തിന്റെ സംപ്രേഷണാവകാശം നാലുകോടിക്ക് അടുത്താണ് വിറ്റുപോയത്.
എന്തുതന്നെയായാലും തുടർച്ചയായ പരാജയങ്ങൾ നേരിട്ടുകൊണ്ടിരുന്ന ജയറാമിന് ചിത്രം വളരെ വലിയ ഒരു തിരിച്ചുവരവിന് തന്നെയാണ് വഴിയൊരുക്കിയിരിക്കുന്നത്. ചിത്രത്തിനെ ഇത്ര വലിയ വിജയമാക്കി മാറ്റിയ പ്രേക്ഷകർക്കും രമേഷ് പിഷാരടിക്കും നന്ദിപറഞ്ഞുകൊണ്ട് കഴിഞ്ഞദിവസം ജയറാം ഫേസ്ബുക്കിൽ എത്തിയിരുന്നു. ചിത്രത്തിന്റെ വിജയം ആഘോഷിക്കാൻ കഴിഞ്ഞ ഞായറാഴ്ച ജയറാം 3 തീയറ്ററുകളിലെത്തി. ഒരു കാലത്ത് മലയാളികളുടെ പ്രിയങ്കരനായ കുടുംബനായകൻ തിരിച്ചുവന്നതിൽ കുടുംബപ്രേക്ഷകരും വളരെയധികം സന്തോഷത്തിലാണ്. ചിത്രത്തിനായി ജയറാം വളരെയധികം മേക്കോവറുകളും കഷ്ടപ്പാടുകളും സഹിച്ചിരുന്നു. എന്തു തന്നെയായാലും അതിനുള്ള വലിയൊരു ഫലം കിട്ടി എന്നു തന്നെ അനുമാനിക്കാം. ചിത്രത്തിൽ അഭിനേതാക്കൾക്കൊപ്പം പക്ഷിമൃഗാദികൾക്കും കൂടി പ്രാധാന്യം നൽകിയിട്ടുണ്ട്. മണിയൻപിള്ള രാജു പ്രൊഡക്ഷൻസിനുവേണ്ടി മണിയൻപിള്ള രാജുവാണ് ചിത്രം നിർമ്മിച്ചിരിക്കുന്നത്.
