കിളി പോയി എന്ന ആസിഫ് അലി ചിത്രമൊരുക്കി അരങ്ങേറ്റം കുറിച്ച സംവിധായകൻ ആണ് വിനയ് ഗോവിന്ദ്. അതിനു ശേഷം അദ്ദേഹം ആസിഫ് അലി- ഇന്ദ്രജിത് ടീമിനെ വെച്ച് കോഹിനൂർ എന്ന ചിത്രവും സംവിധാനം ചെയ്തു. ഇപ്പോഴിതാ തന്റെ മൂന്നാമത്തെ ചിത്രവുമായി വരാൻ തയ്യാറെടുക്കുകയാണ്‌ വിനയ് ഗോവിന്ദ്. ജനപ്രിയ നടൻ ജയറാം ആണ് ഈ ചിത്രത്തിൽ നായകനായി എത്തുന്നത്. ലിയോ തദേവൂസ് ഒരുക്കുന്ന ലോനപ്പന്റെ മാമോദീസ എന്ന ചിത്രം പൂർത്തിയാക്കുന്ന ജയറാം അത് കഴിഞ്ഞാലുടൻ തന്നെ വിനയ് ഗോവിന്ദ് ചിത്രത്തിൽ ജോയിൻ ചെയ്യും. വിനയ് ഗോവിന്ദ്- ജയറാം ചിത്രം അടുത്തയാഴ്ച ഷൂട്ടിംഗ് തുടങ്ങും എന്നാണ് ഇപ്പോൾ ലഭിക്കുന്ന വിവരങ്ങൾ പറയുന്നത്.
ഇതുവരെ ടൈറ്റിൽ ഇട്ടിട്ടില്ലാത്ത ഈ ചിത്രത്തിന്റെ കൂടുതൽ വിവരങ്ങൾ വരും ദിവസങ്ങളിൽ പുറത്തു വരും എന്നാണ് പ്രതീക്ഷിക്കപ്പെടുന്നത്. ജയറാം- ലിയോ തേദേവൂസ് ചിത്രം നാളെ പൂർത്തിയാവും എന്നാണ് റിപ്പോർട്ടുകൾ പറയുന്നത്. സംവിധായകൻ തന്നെ രചന നിർവഹിച്ച ഈ ചിത്രത്തിൽ അന്ന രാജനും കനിഹയും ആണ് നായികാ വേഷങ്ങളിൽ എത്തുന്നത്. ശാന്തി കൃഷ്ണയും ഒരു പ്രധാന വേഷം ചെയ്യുന്ന ഈ ചിത്രം നിർമ്മിക്കുന്നത് പെൻ ആൻഡ് പേപ്പർ ക്രീയേഷന്സിന്റെ ബാനറിൽ ഷിനോയ് മാത്യു ആണ്. ഈ വർഷം ഏപ്രിൽ റിലീസ് ആയെത്തിയ പഞ്ചവർണ്ണതത്തയുടെ വിജയത്തിലൂടെ ശക്തമായ തിരിച്ചു വരവ് കാഴ്ച വെച്ച ജയറാം ഇപ്പോൾ ഒരുപിടി മികച്ച കുടുംബ ചിത്രങ്ങളിലൂടെ വിജയം തുടരാൻ ഉള്ള ഒരുക്കത്തിൽ ആണ്. ലോനപ്പന്റെ മാമോദീസ ക്രിസ്മസ് റിലീസ് ആയി ആണ് തിയേറ്ററിൽ എത്തുക.
