ചെന്നൈ: ശങ്കര്‍ സംവിധാനം ചെയ്ത് കമൽഹാസന്‍ നായകനാകുന്ന ബ്രമാണ്ട ചിത്രം ഇന്ത്യൻ 2 ഷൂട്ടിങ്ങ് ലൊക്കേഷനിൽ അപകടം. സൈറ്റിൽ ക്രെയിൻ മറിഞ്ഞ് വീണാണ് അപകടമുണ്ടായത്. ക്രെയിൻ ഉപയോഗിച്ച് നടത്തേണ്ട ഒരു സീനിന്‍റെ ചിത്രീകരണത്തിനായുള്ള തയ്യാറെടുപ്പിനിടെ ആണ് അപകടം ഉണ്ടായത്. ഇപ്പോള്‍ ലഭിക്കുന്ന വിവരങ്ങൾ പ്രകാരം അപകടത്തിൽ സാങ്കേതിക പ്രവർത്തകരായ മൂന്ന് പേർ മരിച്ചു. മരിച്ച രണ്ട് പേര്‍ ശങ്കറിന്‍റെ സഹസംവിധായകരാണെന്നാണ് കിട്ടുന്ന വിവരങ്ങൾ. കൂടാതെ പത്ത് പേർക്ക് സാരമായി പരിക്കേറ്റിട്ടുമുണ്ട്.
റിപ്പോർട്ടുകൾ പ്രകാരം അപകട സമയത്ത് നടൻ കമൽഹാസൻ ലൊക്കേഷനിൽ ഉണ്ടായിരുന്നു. ഷങ്കർ- കമൽ ഹാസൻ കൂട്ടുകെട്ടിൽ 24 വർഷങ്ങൾക്ക്‌ മുൻപ് പുറത്തു വന്ന ബ്ലോക്ക്ബസ്റ്റർ ചിത്രമായ ഇന്ത്യന്റെ രണ്ടാം ഭാഗം ആയാണ് ഈ ചിത്രം ഒരുങ്ങികൊണ്ടിരുന്നത്. ചില സാങ്കേതിക തടസ്സങ്ങൾ മൂലം ഷൂട്ടിംഗ് നിർത്തി വെച്ചിരുന്നെകിലും നിര്‍മാതാക്കളായ ലൈക്ക പ്രൊഡക്ഷന്‍സുമായി സംവിധായകൻ ശങ്കര്‍ നടത്തിയ ചര്‍ച്ചയെ തുടര്‍ന്നാണ് ഷൂട്ടിംഗ് ഷൂട്ടിംഗ് പുനരാരംഭിച്ചത്.
ലൈക്ക പ്രൊഡക്ഷൻസ് നിർമ്മിക്കുന്ന ഇന്ത്യൻ 2 ഇൽ കാജൽ അഗർവാൾ, സിദ്ധാർഥ്, രാകുൽ പ്രീത് സിങ്, വിവേക്, ഡൽഹി ഗണേഷ്, സമുദ്രക്കനി, നെടുമുടി വേണു, ബോബി സിംഹ എന്നിവരും അഭിനയിക്കുന്നുണ്ട്.
