പ്രശസ്ത സംവിധായകൻ ശ്യാമ പ്രസാദ് യുവ താരം നിവിൻ പോളിയെ നായകനാക്കി ഒരുക്കിയ ചിത്രമാണ് ഹേ ജൂഡ്. ഒരു മ്യൂസിക്കൽ റൊമാന്റിക് കോമഡി ചിത്രമായി ഒരുക്കിയിരിക്കുന്ന ഈ ചിത്രത്തിന്റെ പ്രത്യേകത തന്നെ നിവിൻ പോളിയുടെ വ്യത്യസ്ത മേക് ഓവർ ആണ്. ജൂഡ് എന്ന കഥാപാത്രത്തെ അവതരിപ്പിക്കാൻ ആയി തന്റെ ശരീര ഭാരം വർധിപ്പിച്ച നിവിൻ പൊളി, ഒരു അഭിനേതാവ് എന്ന നിലയിൽ കൂടുതൽ മുന്നോട്ടു പോകുന്ന പ്രകടനമാണ് ഈ ചിത്രത്തിൽ കാഴ്ച വെച്ചിരിക്കുന്നത് എന്നാണ് റിപ്പോർട്ടുകൾ സൂചിപ്പിക്കുന്നത്. ഒരു താരം എന്നതിലുപരി, നിവിൻ പോളി എന്ന നടന്റെ വളർച്ചയാവും ഈ ചിത്രം നമ്മുടെ മുന്നിൽ കാണിച്ചു തരിക എന്നാണ് ഈ ചിത്രത്തിന്റെ ട്രൈലെർ നമ്മുക്ക് നൽകുന്ന സൂചന. ചിത്രത്തിന്റെ ട്രൈലറിൽ പോലും നമ്മുക്ക് നിവിൻ എന്ന നടന്റെ മികച്ച അഭിനയ മുഹൂർത്തങ്ങൾ കാണാൻ സാധിക്കും. നിർമ്മൽ സഹദേവ് ആണ് ഈ ചിത്രത്തിന് തിരക്കഥ രചിച്ചിരിക്കുന്നത്.
ഈ ചിത്രത്തിൽ നിവിൻ പോളിയുടെ നായിക ആയി എത്തിയിരിക്കുന്നത് തെന്നിന്ത്യൻ താര സുന്ദരിയായ തൃഷ ആണ്. തൃഷയുടെ ആദ്യ മലയാള ചിത്രമാണ് ഹേ ജൂഡ്. ഇവരോടൊപ്പം മികച്ച വേഷങ്ങളിൽ സിദിഖ്, വിജയ് മേനോൻ എന്നിവരും ഈ ചിത്രത്തിൽ അഭിനയിക്കുന്നുണ്ട്. അജു വർഗീസ്, നീന കുറുപ്പ് എന്നിവരും ഈ ചിത്രത്തിന്റെ താര നിരയുടെ ഭാഗമാണ്. അമ്പലക്കര ഗ്ലോബൽ ഫിലിംസിന്റെ ബാനറിൽ അനിൽ കുമാർ നിർമ്മിച്ചിരിക്കുന്ന ഈ ചിത്രം ഇ ഫോർ എന്റർടൈൻമെന്റ് ആണ് കേരളത്തിൽ പ്രദർശനത്തിന് എത്തിക്കുന്നത്. രാഹുൽ രാജ്, ഔസേപ്പച്ചൻ, ഗോപി സുന്ദർ, എം ജയചന്ദ്രൻ തുടങ്ങി നാല് സംഗീത സംവിധായകർ ചേർന്നാണ് സംഗീതം വിഭാഗം കൈകാര്യം ചെയ്തിരിക്കുന്നത് എന്ന പ്രത്യേകതയും ഈ ചിത്രത്തിന് ഉണ്ട്.
