കംപ്ലീറ്റ് ആക്ടർ മോഹൻലാലിനെ നായകനാക്കി പ്രശസ്ത സംവിധായകൻ സിദ്ദിഖ് ഒരുക്കുന്ന പുതിയ ചിത്രമാണ് ബിഗ് ബ്രദർ. സിദ്ദിഖിന്റെ കരിയറിലെ ഏറ്റവും വലിയ മലയാള ചിത്രമായാണ് ബിഗ് ബ്രദർ ഒരുക്കുന്നത്. അദ്ദേഹം തന്നെ രചനയും നിർവഹിച്ച ഈ ചിത്രം ഏകദേശം 25 കോടി രൂപ ബഡ്ജറ്റിൽ ആണ് ഒരുക്കുന്നത്. മോഹൻലാലിന് ഒപ്പം ബോളിവുഡ് താരം അർബാസ് ഖാൻ, അനൂപ് മേനോൻ, സിദ്ദിഖ്, ടിനി ടോം, വിഷ്ണു ഉണ്ണികൃഷ്ണൻ, ഇർഷാദ് തുടങ്ങി ഒരു വലിയ താര നിര അണിനിരക്കുന്ന ഈ ചിത്രത്തിലെ നായികാ വേഷം ചെയ്യുന്നത് ഒരു പുതുമുഖം ആണ്. മിർണ്ണ മേനോൻ എന്നാണ് ഈ പുതുമുഖ നടിയുടെ പേര്.
ബിഗ് ബ്രദർ റിലീസ് ആവുന്നതിനു മുൻപ് തന്നെ ഈ നടി സോഷ്യൽ മീഡിയയുടെ ശ്രദ്ധ നേടിയെടുക്കുകയാണ്. ബിഗ് ബ്രദർ ചിത്രത്തിലെ മിർണ്ണയുടെ ചില ലൊക്കേഷൻ സ്റ്റില്ലുകൾ ആണ് ഇപ്പോൾ വൈറലാവുന്നത്. തന്റെ സൗന്ദര്യം കൊണ്ട് ഏതായാലും ഈ നടി ആരാധകരെ ഉണ്ടാക്കി കഴിഞ്ഞു. അഭിനയ മികവ് കൂടി അവകാശപ്പെടാനായാൽ നാളെ മലയാള സിനിമയിലെ മുൻനിര നടിമാരുടെ കൂട്ടത്തിൽ എത്താൻ ഈ നടിക്കാവും എന്നാണ് ഇപ്പോഴേ ആരാധകർ പറയുന്നത്. മോഹൻലാലിന് ഒപ്പമുള്ള മിർണ്ണയുടെ ലൊക്കേഷൻ ക്ലിക്കുകളും ആരാധകരുടെ ഇടയിൽ തരംഗമാകുന്നുണ്ട്.
മോഹൻലാൽ സച്ചിദാനന്ദൻ എന്ന കഥാപാത്രം ആയി എത്തുന്ന ഈ ചിത്രത്തിൽ മോഹൻലാലിന്റെ അനുജൻ ആയ വിഷ്ണു എന്ന ഡോക്ടറുടെ വേഷമാണ് അനൂപ് മേനോൻ ചെയ്യുന്നത്. കൊച്ചി, ബാംഗ്ലൂർ, മൈസൂർ എന്നിവിടങ്ങളിൽ ആയാണ് ഈ ചിത്രം പൂർത്തിയാവുന്നത്. സ്റ്റണ്ട് സിൽവ, സുപ്രീം സുന്ദർ എന്നിവർ ഒരുക്കിയ ആക്ഷൻ രംഗങ്ങൾ ഉള്ള ഈ ചിത്രത്തിന് വേണ്ടി സംഗീതം ഒരുക്കുന്നത് ദീപക് ദേവ് ആണ്. ജിത്തു ദാമോദർ ആണ് ബിഗ് ബ്രദറിന് വേണ്ടി ക്യാമറ ചലിപ്പിക്കുന്നത്. എസ് ടാകീസ്, നിക്, വൈശാഖ സിനിമ എന്നിവയുടെ ബാനറിൽ സംവിധായകൻ സിദ്ദിഖ്, ജെൻസോ ജോസ്, വൈശാഖ് രാജൻ എന്നിവർ ചേർന്നാണ് ഈ ബിഗ് ബജറ്റ് ചിത്രം നിർമ്മിക്കുന്നത്. ഈ വരുന്ന ക്രിസ്മസിന് ബിഗ് ബ്രദർ തീയേറ്ററുകളിൽ എത്തും.
