ഇപ്പോൾ സോഷ്യൽ മീഡിയയുടെ ശ്രദ്ധ നേടുന്നത് പ്രശസ്ത സിനിമാ താരം ഗിന്നസ് പക്രുവിന്റെ ഒരു ഫേസ്ബുക് പോസ്റ്റ് ആണ്. താൻ ചെറിയ കുട്ടി ആയിരിക്കുമ്പോഴത്തെ ഒരു ഫോട്ടോ പോസ്റ്റ് ചെയ്തു കൊണ്ട് ഗിന്നസ് പക്രു ഇട്ടിരിക്കുന്ന ക്യാപ്‌ഷൻ ഇങ്ങനെ, “പിന്നെ വളർന്നില്ല, വളർത്തിയത് നിങ്ങൾ”. ഈ പോസ്റ്റ് പല പ്രമുഖ സിനിമാ താരങ്ങളും ഷെയർ ചെയ്തിട്ടുമുണ്ട്. ജീവിത വിജയത്തിനുള്ള ഏറ്റവും മികച്ച വഴിയാണ് എന്തിനെയും പോസിറ്റീവ് ആയി നോക്കി കാണുന്നത് എന്ന് പറഞ്ഞു കൊണ്ടാണ് ഗിന്നസ് പക്രുവിന്റെ ഈ പോസ്റ്റ് രമേശ് പിഷാരടി ഷെയർ ചെയ്തിരിക്കുന്നത്. ഒട്ടേറെ ചെറിയ ചെറിയ വേഷങ്ങളിലൂടെ പ്രേക്ഷകരുടെ ശ്രദ്ധ നേടിയെടുത്ത ഗിന്നസ് പക്രു വിനയന്റെ അത്ഭുത ദ്വീപ് എന്ന ചിത്രത്തിലൂടെ നായകനുമായി. പിന്നെ ഒട്ടേറെ ചിത്രങ്ങളിൽ വളരെ പ്രാധാന്യമുള്ള വേഷങ്ങളിൽ പ്രത്യക്ഷപ്പെട്ട ഈ നടൻ ഇന്ന് മലയാള സിനിമാ രംഗത്തെയും ടെലിവിഷൻ രംഗത്തെയും അവിഭാജ്യ ഘടകം ആണ്.
ഗിന്നസ് പക്രു നായകനായ ഒരു ചിത്രം ഇപ്പോൾ റിലീസിന് തയ്യാറെടുക്കുകയാണ്‌. പ്രശസ്ത സംവിധായകൻ മാധവ് രാമദാസൻ ഒരുക്കിയ ഇളയ രാജ എന്ന ചിത്രത്തിൽ ആണ് ഗിന്നസ് പക്രു നായക വേഷത്തിൽ എത്തുന്നത്. ഈ ചിത്രത്തിന്റെ മോഷൻ ടീസർ, ഇതിന്റെ പോസ്റ്ററുകൾ എന്നിവ പ്രേക്ഷകർക്കിടയിൽ ഏറെ ശ്രദ്ധ നേടിയെടുത്തു കഴിഞ്ഞു. മാസ്സ് ലുക്കിൽ ഉള്ള ഗിന്നസ് പക്രുവിന്റെ ഏതാനും പോസ്റ്ററുകൾ ഈ ചിത്രത്തിന്റെ അണിയറ പ്രവർത്തകർ പുറത്തു വിടുകയും ഗംഭീര അഭിപ്രായം നേടിയെടുക്കുകയും ചെയ്തിരുന്നു. സിനിമ സംവിധാനം ചെയ്‌തും ശ്രദ്ധ നേടിയിട്ടുള്ള താരമാണ് ഗിന്നസ് പക്രു.
