മലയാള സിനിമാ പ്രേമികളുടെ പ്രിയതാരമായ വിനീത് ശ്രീനിവാസൻ വീണ്ടും നായകനായി എത്തുന്ന ചിത്രമാണ് അഡ്വക്കേറ്റ് മുകുന്ദൻ ഉണ്ണി അസോസിയേറ്റ്സ്. അഭിനവ് സുന്ദർ നായക് സംവിധാനം ചെയ്ത ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ ഇന്ന് റിലീസ് ചെയ്തു. ചിത്രത്തിന്റെ ടൈറ്റിൽ കഥാപാത്രമായി വിനീത് ശ്രീനിവാസൻ അഭിനയിച്ചിരിക്കുന്നു ഈ ചിത്രം രചിച്ചത് സംവിധായകനും വിമൽ ഗോപാലകൃഷ്ണനും ചേർന്നാണ്. യുവ താരം നിവിൻ പോളിയാണ് ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്തത്. രണ്ട് തലയും ആറ് കൈകളുമായി നിൽക്കുന്ന വിനീത് ശ്രീനിവാസന്റെ രസകരമായ ഒരു ചിത്രമാണ് ഫസ്റ്റ് ലുക്ക് പോസ്റ്ററിൽ നമ്മുക്ക് കാണാൻ സാധിക്കുന്നത്. എഡിറ്റർ അഭിനവ് സുന്ദർ നായക് ആദ്യമായി സംവിധാനം ചെയ്യുന്ന ചിത്രം കൂടിയാണിത്. ജോയ് മൂവി പ്രൊഡക്ഷൻസിന്റെ ബാനറിൽ ഡോക്ടർ അജിത് ജോയി നിർമ്മിക്കുന്ന ചിത്രം ഈ വരുന്ന നവംബറിൽ റിലീസ് ചെയ്യും.
സുരാജ് വെഞ്ഞാറുംമൂട്, ആർഷ ചാന്ദിനി ബൈജു, സുധികോപ്പ, തൻവിറാം, ജോർജ്ജ് കോര, മണികണ്ഠൻ പട്ടാമ്പി, സുധീഷ്, അൽത്താഫ് സലിം, നോബിൾ ബാബു തോമസ്, ബിജു സോപാനം, റിയാസെറ, വിജയൻ കാരന്തൂർ എന്നിവരും വേഷമിടുന്ന ഈ ചിത്രത്തിന് ക്യാമറ ചലിപ്പിച്ചത് വിശ്വജിത്ത് ഒടുക്കത്തിലും എഡിറ്റ് ചെയ്തിരിക്കുന്നത് നിധിൻരാജ് ആരോളും സംവിധായകനും ചേർന്നുമാണ്. സൂപ്പർ ഹിറ്റ് ലാൽ ജോസ് ചിത്രമായ മീശ മാധവനിലെ സലിം കുമാറിന്റെ ജനപ്രിയ കഥാപാത്രമാണ് അഡ്വക്കേറ്റ് മുകുന്ദനുണ്ണി. ആ മുകുന്ദനുണ്ണിക്ക് ഈ ചിത്രവുമായുള്ള ബന്ധം എന്താണെന്നറിയാനുള്ള ആകാംക്ഷയിലാണ് ഇപ്പോൾ പ്രേക്ഷകർ. വിനീത് വീട്ടുതടങ്കലിൽ എന്നമട്ടിൽ പത്രവാർത്തയുടെ രൂപത്തിൽ പുറത്തിറക്കിയ ഈ ചിത്രത്തിന്റെ അന്നൗൺസ്‌മെന്റ് പോസ്റ്ററും നേരത്തെ ഏറെ ശ്രദ്ധ നേടിയിരുന്നു.
