കിസ്മത് എന്ന ഒറ്റ ചിത്രത്തിലൂടെ തന്നെ മലയാള സിനിമാ പ്രേക്ഷകരുടെയും നിരൂപകരുടേയുമെല്ലാം അഭിനന്ദനവും ശ്രദ്ധയും നേടിയെടുത്ത സംവിധായകൻ ആണ് ഷാനവാസ് ബാവക്കുട്ടി. ഇപ്പോഴിതാ അദ്ദേഹം തന്റെ രണ്ടാമത്തെ ചിത്രവുമായി എത്തുകയാണ്. പ്രശസ്ത നടൻ വിനായകനെ നായകനാക്കി ആണ് ഷാനവാസ് ബാവക്കുട്ടി തന്റെ രണ്ടാമത്തെ ചിത്രം ഒരുക്കുന്നത്. തൊട്ടപ്പൻ എന്ന് പേരിട്ടിട്ടുള്ള ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ ഇപ്പോൾ റിലീസ് ചെയ്തു കഴിഞ്ഞു. ഈ പോസ്റ്ററിന് സോഷ്യൽ മീഡിയയുടെ അഭിനന്ദനവും ശ്രദ്ധയും ഇപ്പോൾ ലഭിച്ചു കൊണ്ടിരിക്കുകയാണ് എന്ന് പറയാം. ഒരു കുഞ്ഞിനെ എടുത്തു നിൽക്കുന്ന വിനായകന്റെ ചിത്രം ആണ് ഫസ്റ്റ് ലുക്ക് പോസ്റ്ററിന്റെ ആകർഷണം.
ദേവദാസ് കാടഞ്ചേരി, ശൈലജ മണികണ്ഠൻ എന്നിവർ ചേർന്ന് നിർമ്മിക്കുന്ന ഈ ചിത്രം എഴുതിയിരിക്കുന്നത് പ്രശസ്ത തിരക്കഥ രചയിതാവായ പി എസ് റഫീഖ് ആണ്. സുരേഷ് രാജൻ ഛായാഗ്രഹണം നിർവഹിക്കുന്ന ഈ ചിത്രത്തിന് സംഗീതം ഒരുക്കിയിരിക്കുന്നത് ലീല എൽ, ഗിരീഷ് കുട്ടൻ എന്നിവരാണ്. ജിതിൻ മനോഹർ ആണ് ഈ ചിത്രം എഡിറ്റ് ചെയ്യുന്നത്. ഈ ചിത്രത്തെ കുറിച്ചുള്ള കൂടുതൽ വിവരങ്ങൾ വൈകാതെ പുറത്തു വരും. അടുത്ത വർഷം ആയിരിക്കും ഈ ചിത്രം റിലീസ് ചെയ്യാൻ പോകുന്നത്. ലിജോ ജോസ് പെല്ലിശ്ശേരി ഒരുക്കുന്ന പുതിയ ചിത്രമായ ജെല്ലിക്കെട്ടിലും വിനായകൻ പ്രധാന വേഷം ചെയ്യുന്നുണ്ട്. അത് കൂടാതെ കരിന്തണ്ടൻ എന്നൊരു ബിഗ് ബജറ്റ് ചിത്രവും വിനായകനെ വെച്ച് പ്ലാനിംഗ് നടന്നു കൊണ്ടിരിക്കുകയാണ്. കമ്മട്ടിപ്പാടത്തിലെ അഭിനയത്തിന് സംസ്ഥാന അവാർഡ് നേടിയതോടെ കൈ നിറയെ അവസരങ്ങൾ ആണ് ഈ നടനെ തേടിയെത്തുന്നത്.
