പ്ലസ് ടു, ബോബി എന്നീ ചിത്രങ്ങൾക്കു ശേഷം ഷെബി ചൗഘട് കഥയെഴുതി സംവിധാനം ചെയ്ത “കാക്കിപ്പട” എന്ന ചിത്രം പ്രേക്ഷകരുടെ മുന്നിലേക്ക്‌ എത്തുകയാണ്. ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ മെഗാസ്റ്റാർ മമ്മൂട്ടിയാണ് റിലീസ് ചെയ്തത്. സമകാലീന സംഭവങ്ങളുമായി വളരെ ബന്ധമുള്ള ഒരു പ്രമേയമാണ് ഈ ചിത്രം ചർച്ച ചെയ്യുന്നത് എന്നും, യഥാർത്ഥത്തിൽ സംഭവിച്ചതിനെക്കാള്‍ മുകളിൽ നിൽക്കുന്ന കാര്യങ്ങളാണ്‌ ഈ സിനിമയില്‍ ഉള്ളതെന്നും ഈ ചിത്രത്തിന്റെ തിരക്കഥാകൃത്തും സംവിധായകനുമായ ഷെബി ചൌക്കട്ട് വെളിപ്പെടുത്തി. ഫസ്റ്റ് ലുക്ക് പോസ്റ്ററിന്‍റെ റിലീസിനോടനുബന്ധിച്ചു നടത്തിയ പത്ര സമ്മേളനത്തിലായിരുന്നു അദ്ദേഹം ഈ കാര്യങ്ങൾ വിശദീകരിച്ചത്. ചിത്രത്തിന്റെ പോസ്റ്റ് പ്രൊഡക്ഷൻ സമയത്ത് വന്ന ചില വാർത്തകളുമായി ഇതിന്റെ കഥയുടെ ബന്ധം അറിഞ്ഞ അണിയറ പ്രവർത്തകർ അങ്കലാപ്പിലായെന്നും അത്രയധികം കാലിക പ്രസക്തി ഇതിൽ പറയുന്ന കഥക്കുണ്ടെന്നും അദ്ദേഹം പറഞ്ഞു.
തെളിവെടുപ്പിനായി കൊണ്ടുവരുന്ന ഒരു പ്രതിക്കൊപ്പം സഞ്ചരിക്കേണ്ടി വരുന്ന എട്ട് ആംഡ് പൊലീസ് ഉദ്യോഗസ്ഥരുടെ കഥയാണ് ഈ ചിത്രം പറയാൻ പോകുന്നത്. എസ്.വി.പ്രൊഡക്ഷൻ സിൻ്റ ബാനറിൽ ഷെജി വലിയകത്ത് നിർമ്മിച്ച ഈ ത്രില്ലർ ചിത്രത്തിൽ നിരഞ്ജ് മണിയൻ പിള്ള രാജു, അപ്പാനി ശരത്ത്, ചന്തുനാഥ്‌, ആരാധികാ, സുജിത് ശങ്കർ, മണികണ്ഠൻ ആചാരി, ജയിംസ് ഏല്യാ, സജിമോൻ പാറായിൽ, വിനോദ് സാക് (രാഷസൻ ഫെയിം), സിനോജ് വർഗീസ്, കുട്ടി അഖിൽ, സൂര്യാ അനിൽ, പ്രദീപ്, ഷിബുലാബാൻ, മാലാ പാർവ്വതി എന്നിവരാണ് പ്രധാന വേഷങ്ങൾ ചെയ്യുന്നത്. ജാസി ഗിഫ്റ്റ് സംഗീതമൊരുക്കിയ ഈ ചിത്രത്തിന് കാമറ ചലിപ്പിച്ചത് പ്രശാന്ത് കൃഷ്ണയും എഡിറ്റിംഗ് നിർവഹിച്ചത് ബാബു രത്‌നവുമാണ്. സ്ഥിരം പോലീസ് അന്വേഷണ കഥകളിൽ നിന്നും വ്യത്യസ്തമായി പോലീസ്സുകാരുടെയും പ്രതിയുടെയും മാനസികാവസ്ഥയും കുറ്റവാളിയില്‍ നിന്ന് പോലീസുകാരിലേക്കുള്ള അന്വേഷണത്തിന്‍റെ സഞ്ചാരവുമാണ് ഈ ചിത്രത്തിലുണ്ടാവുക.
