മലയാളത്തിന്റെ യുവ താരം ഫഹദ് ഫാസിൽ അന്യ ഭാഷാ ചിത്രങ്ങളിൽ മാസ്സ് കഥാപാത്രങ്ങളായി എത്തി ഈ അടുത്തിടെ വലിയ പ്രേക്ഷക ശ്രദ്ധ നേടിയിരുന്നു. ലോകേഷ് കനകരാജ് ഒരുക്കിയ വിക്രത്തിലെ അമർ എന്ന കഥാപാത്രവും, സുകുമാർ ഒരുക്കിയ പുഷ്പയിലെ ഭൻവർ സിങ് എന്ന വില്ലൻ വേഷവും അങ്ങനെ ശ്രദ്ധ നേടിയതാണ്. മലയാളത്തിൽ വളരെ ചുരുക്കം ചില മാസ്സ് കഥാപാത്രങ്ങൾ മാത്രമേ ഫഹദ് ഫാസിൽ ചെയ്തിട്ടുള്ളു. ഇപ്പോഴിതാ ഫഹദ് ഫാസിൽ നായകനായി എത്തുന്ന പുത്തൻ ചിത്രം പ്രഖ്യാപിച്ചിരിക്കുകയാണ്. ഹനുമാൻ ഗിയർ എന്ന് പേരിട്ടിരിക്കുന്ന ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ സൂചിപ്പിക്കുന്നത് ഇതൊരു മാസ്സ് ആക്ഷൻ ചിത്രമായിരിക്കുമെന്നാണ്. സുധീഷ് ശങ്കർ സംവിധാനം ചെയ്യാൻ പോകുന്ന ഈ ചിത്രം നിർമ്മിക്കുന്നത് ആർ ബി ചൗധരിയുടെ നിർമ്മാണ കമ്പനിയായ സൂപ്പർ ഗുഡ് ഫിലിംസാണ്. അവരുടെ 96 ആം ചിത്രമായാണ് ഹനുമാൻ ഗിയർ ഒരുങ്ങുന്നത്.
ജനപ്രിയ നായകൻ ദിലീപ് നായകനായ വില്ലാളി വീരൻ എന്ന ചിത്രം സംവിധാനം ചെയ്ത്കൊണ്ട് അരങ്ങേറ്റം കുറിച്ചയാളാണ് സുധീഷ് ശങ്കർ. ജീപ്പിന് മുകളിൽ തിരിഞ്ഞ് നിന്ന് ഒരു കൈ പൊക്കിക്കൊണ്ട് നിൽക്കുന്ന ഫഹദ് ഫാസിലിനെയാണ് ഹനുമാൻ ഗിയറിന്റെ പോസ്റ്ററിൽ നമുക്ക് കാണാൻ സാധിക്കുന്നത്. മലയൻകുഞ്ഞ് എന്ന ചിത്രമാണ് ഫഹദിന്റേതായി ഒടുവിൽ പ്രേക്ഷകരുടെ മുന്നിലെത്തിയ മലയാള ചിത്രം. ഫാസിൽ നിർമ്മിച്ച് നവാഗതനായ സജിമോൻ സംവിധാനവും മഹേഷ് നാരായണൻ രചനയും നിർവഹിച്ച ഈ ചിത്രം ഒരു സർവൈവൽ ത്രില്ലറായാണ് ഒരുക്കിയത്. അഖിൽ സത്യൻ സംവിധാനം ചെയ്യുന്ന പാച്ചുവും അത്ഭുത വിളക്കും മാരി സെൽവരാജ് ഒരുക്കുന്ന മാമന്നൻ, സുകുമാർ ഒരുക്കുന്ന പുഷ്പ 2 എന്നിവയാണ് ഇനി വരാനുള്ള മറ്റ് ഫഹദ് ചിത്രങ്ങൾ.
