മലയാള സിനിമയിലെ ഏറ്റവും സ്റ്റൈലിഷ് താരമാണ് ദുൽഖർ സൽമാൻ. സെക്കന്റ് ഷോ എന്ന ചിത്രത്തിലൂടെയാണ് താരം ആദ്യമായി മലയാള സിനിമയുടെ ഭാഗമായത്. 2012ൽ ശ്രീനാഥ് രാജേന്ദ്രൻ സംവിധാനം ചെയ്ത സെക്കന്റ് ഷോ എന്ന ചിത്രത്തിലൂടെ തന്നെ താരം പ്രേക്ഷകരുടെ ശ്രദ്ധ പിടിച്ചുപറ്റി. ചുരുങ്ങിയ കാലങ്ങൾ കൊണ്ട് വലിയ തോതിൽ ആരാധകരെയും സൃഷ്ട്ടിക്കാൻ ദുൽഖറിന് സാധിച്ചു. ദുൽഖർ സൽമാന്റെ അവസാനമായി മലയാളത്തിൽ പുറത്തിറങ്ങിയ ചിത്രമാണ് ‘സോളോ’, ചിത്രം പ്രതീക്ഷിച്ച നിലവാരം സിനിമ പ്രേമികൾക്കിടയിൽ പുലർത്താൻ സാധിച്ചില്ല. മലയാള സിനിമയിൽ നിറസാനിധ്യമായ താരം പിന്നീട് അന്യ ഭാഷ ചിത്രങ്ങളും അഭിനയിക്കാൻ ആരംഭിച്ചു. ഈ അടുത്ത് റിലീസായ ‘മഹാനടി’ എന്ന ചിത്രത്തിൽ ജമിനി ഗണേശനായി ദുൽഖർ മികച്ച പ്രകടനം കാഴ്ചവെച്ചു, സിനിമ താരങ്ങളുടെ കുറെയേറെ പ്രശംസകളും ദുൽഖറിനെ തേടിയെത്തി.
ഇന്ത്യൻ സിനിമയിൽ തന്നെ ഒരു നടനും കരസ്ഥമാക്കാത്ത അപൂർവങ്ങളിൽ അപൂർവമായ റെക്കോര്ഡ് ദുൽഖർ സ്വന്തമാക്കാൻ ഒരുങ്ങുകയാണ്. 4 വ്യത്യസ്ത ഭാഷകളിൽ അഭിനയിക്കുകയും 4 ചിത്രങ്ങളും ഒരു വർഷം തന്നെ റിലീസിനൊരുങ്ങുന്നു എന്ന റെക്കോർഡായിരിക്കും ദുൽഖറിന്റെ പേരിലാവുന്നത്. ഈ വർഷം ആദ്യം ദുൽഖറിന്റെ പുറത്തിറങ്ങിയത് തെലുഗ് ചിത്രം മഹാനടിയാണ്. അടുത്ത മാസം ദുൽഖറിന്റെ ആദ്യ ഹിന്ദി ചിത്രം ‘കർവാൻ’ പ്രദർശനത്തിനെത്തും. ചിത്രീകരണം പൂർത്തിയാക്കിയ ‘കണ്ണും കണ്ണും കൊല്ലയടിതാൽ’ എന്ന തമിഴ് ചിത്രം റിലീസിനായി ഒരുങ്ങുകയാണ്. നീണ്ട ഇടവേളക്ക് ശേഷം മലയാളത്തിൽ തിരിച്ചു വരുന്ന താരം ‘യമണ്ഡൻ പ്രണയകഥ’ എന്ന ചിത്രത്തിന്റെ ഷൂട്ടിംഗ് തിരക്കിലാണ്, വിഷ്ണു ഉണ്ണികൃഷ്ണൻ – ബിബിൻ ജോർജ് എന്നിവർ ചേർന്നാണ് ചിത്രത്തിന് വേണ്ടി തിരക്കഥ ഒരുക്കിയിരിക്കുന്നത്. ഈ വർഷം ക്രിസ്റ്റമസിന് ചിത്രം പ്രദർശനത്തിനെത്തും.
4 ചിത്രങ്ങളുടെ ഈ വർഷത്തെ റിലീസിന് ശേഷം അപൂർവ റെക്കോര്ഡ് ദുൽഖറിന് സ്വന്തമാവും. എന്നാൽ വീണ്ടും ഈ റെക്കോര്ഡ് അടുത്ത വർഷവും ആവർത്തിക്കാൻ സാധ്യതയുണ്ട്. ദുൽഖറിന്റെ അടുത്ത ചിത്രം ഹിന്ദിയിൽ ‘സോയ ഫാക്റ്ററും, തമിഴിൽ വാനും, മലയാളത്തിൽ സുകുമാര കുറിപ്പുമാണ് അണിയറയിൽ ഒരുങ്ങുന്നത്.
