മലയാളത്തിന്റെ യുവ താരം ദുൽഖർ സൽമാൻ നായകനായി എത്തിയ പുതിയ ചിത്രമായിരുന്നു ഹേ സിനാമിക. തമിഴിൽ ഒരുക്കിയ ഈ ചിത്രം പ്രശസ്ത നൃത്ത സംവിധായിക ആയ ബ്രിന്ദ മാസ്റ്റർ ആദ്യമായി സംവിധാനം ചെയ്ത സിനിമയാണ്. റോ റൊമാന്റിക് കോമഡി ആയി ഒരുക്കിയ ഹേ സിനാമികയിൽ അദിതി റാവു, കാജൽ അഗർവാൾ എന്നിവരാണ് നായികാ വേഷം ചെയ്തത്. ഈ ചിത്രത്തിന്റെ പ്രമോഷന്റെ ഭാഗമായി ഒരു തമിഴ് യൂട്യൂബ് ചാനലിന് നൽകിയ അഭിമുഖത്തിൽ ദളപതി വിജയ്‌യെ കുറിച്ച് ദുൽഖറും അദിതിയും പറഞ്ഞ വാക്കുകൾ ഏറെ ശ്രദ്ധ നേടുകയാണ്. അദ്ദേഹത്തോട് തനിക്കു ചോദിയ്ക്കാൻ ഉള്ളത് ഇപ്പോഴും ഇത്ര യുവത്വത്തോടെ എങ്ങനെ ഇരിക്കുന്നു എന്നാണെന്നു അദിതി പറയുമ്പോൾ, ദുൽഖർ പറയുന്നത് അദ്ദേഹത്തിന്റെ നൃത്തത്തെ കുറിച്ചാണ്. ഇത്ര ഗംഭീരമായി എങ്ങനെ നീളമുള്ള ഡാൻസ് സീനുകൾ ചെയ്യാൻ സാധിക്കുന്നു എന്നും ദുൽഖർ അത്ഭുതത്തോടെ പറയുന്നു.
വളരെ നീളമുള്ള നൃത്ത രംഗങ്ങൾ ഒക്കെ വളരെ ഈസി ആയാണ് അദ്ദേഹം ചെയ്യുന്നത് എന്നും, ആ സീനുകളിൽ അദ്ദേഹം കൊണ്ട് വരുന്ന ഊർജം വളരെ വലുതാണ് എന്നും ദുൽഖർ പറഞ്ഞു. അത്കൊണ്ട് തന്നെ അനിരുദ്ധ് പോലെയുള്ള സംഗീത സംവിധായകൻ ഗാനങ്ങൾ ഒരുക്കുമ്പോൾ വിജയ്ക്ക് നൃത്തം ചെയ്യാൻ വേണ്ടി തന്നെ നീളമുള്ള മ്യൂസിക് പോർഷനുകൾ ഗാനങ്ങളിൽ ഒരുക്കുമെന്നും ദുൽഖർ പറഞ്ഞു. പുതിയ വിജയ് ചിത്രമായ ബീസ്റ്റിലെ അറബിക് കുത്ത് എന്ന ഗാനം കേട്ടിരുന്നു എന്നും അതിലെ നൃത്തവും ഏറെ മനോഹരമാണെന്നും ദുൽഖർ അദിതിയും പറയുന്നു. വിജയ് നൃത്തം ചെയ്യുന്നത് കാണുമ്പോൾ ശരീരത്തിലെ ഓരോ അംശവും നൃത്തം ചെയ്യുന്നത് കാണുന്നത് പോലത്തെ ഫീലാണ് എന്നും അവർ പറഞ്ഞു.
