മലയാളത്തിന്റെ യുവ താരം ദുൽഖർ സൽമാൻ നായകനായി എത്തുന്ന ഏറ്റവും പുതിയ തമിഴ് ചിത്രമാണ് ഹേ സിനാമിക. പ്രശസ്ത നൃത്ത സംവിധായിക ആയ ബ്രിന്ദ മാസ്റ്റർ ആദ്യമായി സംവിധാനം ചെയ്ത ഈ ചിത്രം ഒരു റൊമാന്റിക് കോമഡി ചിത്രമായാണ് ഒരുക്കിയിരിക്കുന്നത് എന്നാണ് സൂചന. കാജൽ അഗർവാൾ, അദിതി റാവു എന്നിവർ നായികമാരായി എത്തുന്ന ഈ ചിത്രം ഫെബ്രുവരി ഇരുപത്തിനാലിനു റിലീസ് ചെയ്യും എന്നാണ് നേരത്തെ പ്രഖ്യാപിച്ചിരുന്നത് എങ്കിലും, അതേ ദിവസം തന്നെ തല അജിത് നായകനായി എത്തുന്ന വലിമൈ റിലീസ് വന്നത് കൊണ്ട് ഇപ്പോൾ ഹേ സിനാമിക പുതിയ തീയതിയിലേക്കു റിലീസ് മാറ്റിയിരിക്കുകയാണ്. ഇനി ഈ ചിത്രം മാർച്ച് മൂന്നു മുതൽ ആണ് പ്രദർശനം ആരംഭിക്കുക എന്നാണ് ഒഫീഷ്യൽ ആയി പുറത്തു വിട്ടിരിക്കുന്നത്. ദുൽഖർ സൽമാൻ തന്നെയാണ് ഈ വിവരം തന്റെ സോഷ്യൽ മീഡിയ പേജിലൂടെ അറിയിച്ചിരിക്കുന്നത്.
മദൻ കർക്കി തിരക്കഥ രചിച്ച ഈ ചിത്രത്തിലെ രണ്ടു ഗാനങ്ങൾ ഇതിനോടകം സൂപ്പർ ഹിറ്റായി മാറിയിട്ടുണ്ട്. അതിലൊന്ന് ആലപിച്ചതും ദുൽഖർ സൽമാൻ ആണ്. ഗോവിന്ദ് വസന്ത ആണ് ഈ ചിത്രത്തിന് വേണ്ടി സംഗീത സംവിധാനം നിർവഹിച്ചിരിക്കുന്നത്. ജിയോ സ്റ്റുഡിയോയും ഗ്ലോബൽ വൺ സ്റ്റുഡിയോയും ചേർന്ന് നിർമ്മിച്ച ഈ ചിത്രത്തിൽ നക്ഷത്ര നാഗേഷ്, മിർച്ചി വിജയ്, താപ്പ, കൗശിക്, അഭിഷേക് കുമാർ, പ്രദീപ് വിജയൻ കോതണ്ഡ രാമൻ, ഫ്രാങ്ക്, സൗന്ദര്യാ, ജെയിൻ തോംപ്സൺ, നഞ്ഞുണ്ടാൻ, രഘു, സംഗീത, ധനഞ്ജയൻ, യോഗി ബാബു എന്നിവരും അഭിനയിച്ചിട്ടുണ്ട്. പ്രീത ജയരാമൻ കാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് രാധ ശ്രീധർ ആണ്. മാർച്ചിൽ വമ്പൻ ചിത്രങ്ങളാണ് ഇതിനോടകം റിലീസ് പ്രഖ്യാപിച്ചിരിക്കുന്നത്. സൂര്യ, പ്രഭാസ്, രാജമൗലി ചിത്രങ്ങളൊക്കെ മാർച്ചിൽ ആണ് റിലീസ് ചെയ്യാൻ പോകുന്നത്.
