ഈ വർഷം റീലീസ് ആയ മലയാള ചിത്രങ്ങളിൽ ഏറ്റവും വലിയ പ്രേക്ഷക- നിരൂപക പ്രശംസയും ആഗോള വിജയവും നേടിയെടുത്ത ചിത്രമാണ് കംപ്ലീറ്റ് ആക്ടർ മോഹൻലാൽ നായകനായ ദൃശ്യം 2. ജീത്തു ജോസഫ് രചിച്ചു സംവിധാനം ചെയ്ത ഈ ചിത്രം ആമസോണ് പ്രൈം റിലീസ് ആയാണ് പുറത്തു വന്നത്. ഈ ചിത്രത്തിന് അവർ നൽകിയ തുക അന്ന് പുറത്തു വിട്ടിരുന്നില്ല. ഇപ്പോഴിതാ, ഒറ്റിറ്റി ഗ്ലോബൽ എന്ന പ്രമുഖ ടീം ആ വിവരങ്ങൾ പുറത്തു വിട്ടിരിക്കുകയാണ്. ഒടിടി റിലീസുകൾ സംബന്ധിച്ച ഓരോ വിവരങ്ങളും പുറത്തു വിടുന്ന ഓണ്ലൈന് ടീമാണ് ഒടിടി ഗ്ലോബൽ. ദൃശ്യം 2 എന്ന ചിത്രം ആമസോണ് പ്രൈം വാങ്ങിച്ചത് 30 കോടി രൂപ നല്കിയാണെന്നു അവർ പുറത്തു വിട്ട കണക്കുകൾ പറയുന്നു.
ഒരു മലയാള സിനിമക്ക് ലഭിക്കുന്ന ഏറ്റവും വലിയ ഡിജിറ്റൽ റൈറ്റ്‌സ് ആണ് ഇത്. ഇത് കൂടാതെ 10 കോടി രൂപക്ക് മുകളിൽ നൽകി ഏഷ്യാനെറ്റ് ഈ ചിത്രത്തിന്റെ സാറ്റലൈറ്റ് റൈറ്സും നേടിയിട്ടുണ്ട്. ഇപ്പോൾ തെലുങ്കിൽ റീമേക് ചെയ്യുന്ന ഈ ചിത്രം ഫെബ്രുവരി 19 നാണ് റീലീസ് ചെയ്തത്. റിലീസ് ചെയ്ത മാസത്തിൽ ലോകത്തിൽ തന്നെ ഏറ്റവും കൂടുതൽ പേർ കണ്ട ഒടിടി ചിത്രങ്ങളുടെ ലിസ്റ്റിൽ രണ്ടാം സ്ഥാനം നേടിയെടുക്കാനും ഈ മോഹൻലാൽ ചിത്രത്തിന് സാധിച്ചു. ഇതിനു ഒരു മൂന്നാം ഭാഗം കൂടി ഉണ്ടാവുമെന്നും ജീത്തു ജോസഫ് സൂചിപ്പിച്ചിട്ടുണ്ട്. 27 കോടി നേടിയ മരക്കാർ അറബിക്കടലിന്റെ സിംഹം, 13.5 കോടി നേടിയ ലുസിഫെർ എന്നിവയാണ് ഏറ്റവും കൂടുതൽ ഒടിടി റൈറ്റ്‌സ് നേടിയ മറ്റു മലയാള ചിത്രങ്ങൾ. ഇവ രണ്ടും തീയേറ്റർ റിലീസ് കഴിഞ്ഞു 50 ദിവസത്തിനു ശേഷം മാത്രം ഒടിടി സ്‌ട്രീമിംഗ്‌ എന്ന വ്യവസ്ഥയിൽ ഡിജിറ്റൽ റൈറ്റ്‌സ് വിറ്റ ചിത്രങ്ങളാണ്.
