നടിയെ ആക്രമിച്ച ഗൂഢാലോചന കേസിൽ ദിലീപ് അറസ്റ്റിലായപ്പോൾ പാതിവഴിയിൽ നിന്ന് പോയതാണ് കമ്മാരസംഭവത്തിന്റെ ഷൂട്ടിങ്. ഇനി കമ്മാരസംഭവം പൂർത്തിയാകുമോ എന്ന ഏറെ നാളത്തെ സംശയത്തിന് വിരാമമിട്ടുകൊണ്ട് ചിത്രത്തിന്റെ ഷൂട്ടിങ് പുനരാരംഭിച്ചു.
85 ദിവസത്തെ ജയിൽ ജീവിതത്തിന് ശേഷം ജാമ്യത്തിൽ ഇറങ്ങിയ ദിലീപ് കമ്മാരസംഭവം പൂർത്തിയാക്കാൻ തീരുമാനിക്കുകയായിരുന്നു. നവാഗതനും പരസ്യസംവിധായകനുമായ രതീഷ് അമ്പാട്ടാണ് കമ്മാരസംഭവത്തിന്റെ സംവിധായകൻ. മലപ്പുറം വേങ്ങരയാണ് ഇപ്പോൾ ചിത്രീകരണം നടക്കുന്നത്.
20 കോടിയോളം ബഡ്ജറ്റിൽ ആണ് കമ്മാരസംഭവം ഒരുങ്ങുന്നത്. മുരളി ഗോപി തിരക്കഥ ഒരുക്കുന്ന ചിത്രം ഗോകുലം മൂവീസ് ആണ് നിർമ്മിക്കുന്നത്.
20 ദിവസത്തെ ചിത്രീകരണം ബാക്കിയുള്ളപ്പോഴാണ് ദിലീപ് അറസ്റ്റിൽ ആകുന്നത്. ആ സീനുകൾ ആണ് ഇപ്പോൾ ഷൂട്ട് ചെയ്യുന്നത്.
ദിലീപിനൊപ്പം തമിഴ് താരങ്ങളായ സിദ്ധാർത്ഥ്, ബോബി സിംഹ എന്നിവരും ചിത്രത്തിൽ പ്രധാന വേഷത്തിൽ എത്തുന്നു. നമിത പ്രമോദ് ആണ് നായികയാകുന്നത്.
