മെഗാ സ്റ്റാർ മമ്മൂട്ടി നായകനായി എത്തുന്ന മാമാങ്കം എന്ന ബിഗ് ബജറ്റ് ചിത്രത്തിന്റെ അവസാന ഷെഡ്യൂൾ ഇപ്പോൾ പുരോഗമിക്കുകയാണ്. ജൂൺ മാസത്തോടെ ഈ ചിത്രത്തിന്റെ ഷൂട്ടിംഗ് പൂർത്തിയാവും എന്നാണ് കരുതപ്പെടുന്നത്. വമ്പൻ സെറ്റിൽ ആണ് ഈ ചിത്രത്തിന്റെ അവസാന ഘട്ട ചിത്രീകരണം ഇപ്പോൾ നടക്കുന്നത്. ഇപ്പോഴിതാ ഇതിന്റെ ലൊക്കേഷൻ സ്റ്റില്ലുകൾ സോഷ്യൽ മീഡിയയിൽ എത്തിയിരിക്കുകയാണ്. വ്യത്യസ്ത ഗെറ്റപ്പിൽ ഉള്ള മമ്മൂട്ടിയുടെ സ്റ്റില്ലുകൾ ആണ് ഇപ്പോൾ സോഷ്യൽ മീഡിയയുടെ ശ്രദ്ധ നേടുന്നത്. സജീവ് പിള്ളൈ തുടങ്ങി വെച്ച ഈ ചിത്രം ഇപ്പോൾ സംവിധാനം ചെയ്യുന്നത് എം പദ്മകുമാർ ആണ്. കാവ്യാ ഫിലിമ്സിന്റെ ബാനറിൽ വേണു കുന്നപ്പിള്ളി ആണ് ഈ ചിത്രം നിർമ്മിക്കുന്നത്.
സജീവ് പിള്ളയെ ഒഴിവാക്കിയതുമായി ബന്ധപ്പെട്ട വിവാദങ്ങൾ ഈ ചിത്രത്തെ സോഷ്യൽ മീഡിയയുടെ ചർച്ചാ വിഷയമാക്കി മാറ്റിയിരുന്നു. സജീവ് പിള്ള തന്നെയാണ് ഈ ചിത്രത്തിന്റെ തിരക്കഥയും എഴുതിയിരിക്കുന്നത്. മമ്മൂട്ടിക്കൊപ്പം നീരജ് മാധവ്, ഉണ്ണി മുകുന്ദൻ, അനു സിതാര തുടങ്ങിയവരും ബോളിവുഡ് നടി പ്രാചി ദേശായിയും ഈ ചിത്രത്തിൽ അഭിനയിക്കുന്നുണ്ട്. വമ്പൻ ആക്ഷൻ രംഗങ്ങൾ ഈ ചിത്രത്തിന്റെ ഹൈലൈറ്റ് ആയിരിക്കും എന്നാണ് സൂചന. ഏകദേശം 30 കോടി രൂപ മുതൽ മുടക്കിൽ ആണ് ഈ ചിത്രം ഒരുങ്ങുന്നത് എന്നാണ് റിപ്പോർട്ടുകൾ പറയുന്നത്. ഈ വർഷം അവസാനമോ അടുത്ത വർഷം ആദ്യമോ മാമാങ്കം റിലീസ് ചെയ്യും എന്നാണ് ഇപ്പോൾ ലഭിക്കുന്ന വിവരങ്ങൾ പറയുന്നത്. ഏതായാലും മമ്മൂട്ടിയുടെ കരിയറിലെ മികച്ച ചിത്രങ്ങളിൽ ഒന്നായി മാമാങ്കം മാറും എന്ന് തന്നെയാണ് ആരാധകരുടെ പ്രതീക്ഷ.
