മലയാളത്തിന്റെ യുവതാരങ്ങളിലൊരാളായ പ്രണവ് മോഹൻലാൽ തെലുങ്കിലേക്ക് എന്ന വാർത്തകൾ കഴിഞ്ഞ കുറച്ചു നാളുകളായി സമൂഹ മാധ്യമങ്ങളിൽ പ്രചരിക്കുന്നുണ്ട്. ഹൃദയം, വർഷങ്ങൾക്ക് ശേഷം എന്നീ ബ്ലോക്ക്ബസ്റ്റർ ചിത്രങ്ങൾക്ക് ശേഷം പ്രണവ് നായകനായി എത്തുന്ന ചിത്രം ഒരുങ്ങുന്നത് തെലുങ്കിലാണെന്നും ജനതാ ഗാരേജ് എന്ന മോഹൻലാൽ- ജൂനിയർ എൻ ടി ആർ ചിത്രത്തിലൂടെ മലയാളികൾക്കും ഏറെ പരിചിതനായ സംവിധായകൻ കൊരടാല ശിവയാണ് പ്രണവിന്റെ തെലുങ്ക് അരങ്ങേറ്റ ചിത്രം സംവിധാനം ചെയ്യുക എന്നുമാണ് വാർത്തകൾ പരന്നത്.
മൈത്രി മൂവി മേക്കേഴ്‌സ് നിർമ്മിക്കുന്ന ഈ ചിത്രത്തിൽ അതിഥി താരമായി മോഹൻലാലും അഭിനയിക്കുമെന്നും സ്ഥിരീകരിക്കാത്ത വാർത്തകൾ വന്നു. ഇപ്പോൾ വരുന്ന വാർത്തകൾ സൂചിപ്പിക്കുന്നത് ഈ ബിഗ് ബഡ്ജറ്റ് ചിത്രത്തിൽ കൃത്യ ഷെട്ടി, നിത്യ മേനോൻ, നവീൻ പോളി ഷെട്ടി എന്നിവരും വേഷമിടുമെന്നാണ് തെലുങ്ക് മാധ്യമങ്ങൾ പറയുന്നതെന്നാണ്. ഈ വാർത്തകളിലെ സത്യം എന്തെന്നറിയാനുള്ള ആകാംക്ഷയിലാണ് പ്രണവ് ആരാധകരും സിനിമാ പ്രേമികളും.
നിലവിൽ ലഭിക്കുന്ന വിവരങ്ങൾ പറയുന്നത്, ഇങ്ങനെ ഒരു പ്രൊജക്റ്റ് പ്രണവ് മോഹൻലാൽ കമ്മിറ്റ് ചെയ്തിട്ടില്ല എന്നാണ്. ഔദ്യോഗികമായ ഒരു സ്ഥിരീകരണവും പ്രണവിനോട് അടുത്ത വൃത്തങ്ങളിൽ നിന്ന് ഈ ചിത്രത്തെ കുറിച്ച് ലഭിച്ചിട്ടില്ല. ജൂനിയർ എൻ ടി ആർ നായകനായ ദേവരയണ്‌ കൊരടാല ശിവയുടെ ഏറ്റവും അവസാനം റിലീസ് ചെയ്ത ചിത്രം. ഈ ചിത്രം ബ്ലോക്ക്ബസ്റ്റർ ഹിറ്റായി മാറിയിരുന്നു.
