ദളപതി വിജയ് നായകനായ ആറ്റ്ലി ചിത്രം ബിഗിൽ ഇപ്പോൾ 250 കോടിയുടെ ആഗോള കളക്ഷനും പിന്നിട്ടു തമിഴ് സിനിമാ ചരിത്രത്തിലെ തന്നെ ഏറ്റവും വലിയ വിജയങ്ങളുടെ പട്ടികയിൽ സ്ഥാനം പിടിച്ചിരിക്കുകയാണ്. തുടർച്ചയായി മൂന്നു ചിത്രങ്ങൾ 250 കോടി ക്ലബിൽ എത്തിയതോടെ വിജയ് എന്ന നടന്റെ താര മൂല്യവും വലിയ രീതിയിൽ ഉയർന്നു കഴിഞ്ഞു. തെരി, മെർസൽ എന്നിവക്ക് ശേഷം ബിഗിലും വമ്പൻ ഹിറ്റായതോടെ സൗത്ത് ഇന്ത്യയിലെ തന്നെ ഏറ്റവും കൂടുതൽ താരമൂല്യം ഉള്ള സംവിധായകനായി ആറ്റ്ലിയും മാറി. പ്രമേയം കൊണ്ട് കൂടി വ്യത്യസ്തത പുലർത്തിയ ബിഗിൽ, വിജയ് എന്ന നടനെ മാത്രം ഫോക്കസ് ചെയ്യാതെ അതിലെ സ്ത്രീ കഥാപാത്രങ്ങൾക്കും അർഹമായ പ്രാധാന്യം ആണ് നൽകിയത്. വനിതാ ഫുട്ബോൾ ടീം കോച്ച് ആയി വിജയ് എത്തിയ ഈ ചിത്രത്തിൽ വനിതാ ഫുട്ബോൾ താരങ്ങൾ ആയി അഭിനയിച്ച എല്ലാ നടിമാരും മികച്ച പ്രകടനമാണ് നൽകിയത്.
ഇപ്പോഴിതാ ഇതിലെ തെൻട്രൽ എന്ന കഥാപാത്രം അവതരിപ്പിച്ച അമൃത അയ്യർ ആ ചിത്രത്തിലെ ഒരുപാട് ടേക്ക് പോയ ഒരു സീൻ താൻ എങ്ങനെയാണു പൂർത്തിയാക്കിയത് എന്ന് വെളിപ്പെടുത്തി മുന്നോട്ടു വന്നിരിക്കുകയാണ്. ഒരുപാട് തവണ എടുക്കേണ്ടി വന്ന ആ രംഗം വിജയ്‌യുടെ സഹായത്തോടെ ആണ് പൂർത്തിയാക്കിയത് എന്ന് പറയുകയാണ് അമൃത. ചിത്രത്തിലെ ഒരു ആശുപത്രി രംഗത്തിൽ വിജയ് സാറിനെ ചീത്ത പറയുന്നത് ആയിരുന്നു താൻ ചെയ്യേണ്ടത് എന്നും എന്നാല്‍ അദ്ദേഹത്തെ ചീത്ത പറയാന്‍ തനിക്കു മനസ്സ് വന്നില്ല എന്നും അമൃത പറയുന്നു .
ഇത് മനസ്സിലാക്കിയ വിജയ് കണ്ണടച്ച് പിടിച്ചപ്പോൾ ആണ് തനിക്കു ആ രംഗം പൂർത്തിയാക്കാൻ സാധിച്ചത് എന്നും അമൃത അയ്യർ പറഞ്ഞു. സിനിമയില്‍ കാണുന്നതില്‍ കൂടുതല്‍ അദ്ദേഹത്തെ ചീത്ത പറയുന്ന രംഗമുണ്ട് എന്നും എന്നാൽ ഭാഗ്യത്തിന് ആ രംഗം ഡിലീറ്റ് ചെയ്തു കളഞ്ഞു എന്നും അമൃത വെളിപ്പെടുത്തി. സിനിമയുടെ വര്‍ക് ഷോപ്പിനു മുമ്പേ താൻ ഫുട്ബോൾ പരിശീലിക്കാൻ ആരംഭിച്ചത് കൊണ്ടാണ് സിനിമയിൽ അത് നന്നായി ചെയ്യാൻ കഴിഞ്ഞത് എന്നും അമൃത പറയുന്നു. ചിത്രത്തില്‍ ഫുട്‌ബോള്‍ ടീം ക്യാപ്റ്റന്‍ ആയാണ് അമൃത അഭിനയിച്ചത്.
