സൂപ്പർ സ്റ്റാർ രജനികാന്തിനെ നായകനാക്കി പ്രശസ്ത സംവിധായകൻ കാർത്തിക് സുബരാജ് ഒരുക്കിയ ചിത്രമാണ് പേട്ട. അദ്ദേഹം തന്നെ രചനയും നിർവഹിച്ച ഈ ചിത്രത്തിൽ വിജയ് സേതുപതി, ബോബി സിംഹ, നവാസുദ്ധീന് സിദ്ദിഖി, സിമ്രാൻ, തൃഷ തുടങ്ങി ഒരു വമ്പൻ താര നിര തന്നെ അണിനിരക്കുന്നുണ്ട്. സൺ പിക്‌ചേഴ്‌സിന്റെ ബാനറിൽ കലാനിധി മാരൻ നിർമ്മിച്ചിരിക്കുന്ന ഈ ചിത്രത്തിന് സംഗീതം ഒരുക്കിയിരിക്കുന്നത് അനിരുദ്ധ് രവിചന്ദർ ആണ്. ഇതിലെ ഗാനങ്ങൾ എല്ലാം തന്നെ ഇതിനോടകം സൂപ്പർ ഹിറ്റായി മാറി കഴിഞ്ഞു. വരുന്ന ജനുവരി രണ്ടാം വാരത്തിൽ പൊങ്കൽ റിലീസ് ആയാണ് പേട്ട പ്രദർശനം ആരംഭിക്കാൻ പോകുന്നത്. എന്നാൽ കേരളത്തിലെ ഈ ചിത്രത്തിന്റെ വിതരണാവകാശത്തിനായി വമ്പൻ മത്സരമാണ് നടക്കുന്നത്.
രജനികാന്തിന്റെ കാല , ധനുഷ് ചിത്രമായ വട ചെന്നൈ എന്നിവ കേരളത്തിൽ വിതരണം ചെയ്ത മിനി സ്റ്റുഡിയോ, അജിത്തിന്റെ വിവേകം, രജനികാന്ത്- ശങ്കർ ചിത്രമായ എന്തിരൻ 2 എന്നിവ ഇവിടെ വിതരണം ചെയ്ത ടോമിച്ചൻ മുളകുപാടത്തിന്റെ മുളകുപാടം ഫിലിംസ്, ദളപതി വിജയ്‌യുടെ സർക്കാർ ഇവിടെ എത്തിച്ച റാഫിയുടെ ഇഫാർ ഇന്റർനാഷണൽ, പിന്നെ ആമർ ഫിലിംസ് എന്നിവയാണ് പേട്ടയുടെ വിതരവകാശം സ്വന്തമാക്കാനുള്ള മത്സരത്തിൽ മുൻപിൽ ഉള്ളത്. ഇവരെ കൂടാതെ മറ്റാരെങ്കിലും കറുത്ത കുതിരയായി അവസാന നിമിഷം മുന്നിലെത്തുമോ എന്നറിയില്ല. ഇതുവരെ ചിത്രത്തിന്റെ വിതരണാവകാശം സംബന്ധിച്ച് ഡീലുകൾ ഒന്നും തന്നെ ആയിട്ടില്ല എന്നുള്ള റിപ്പോർട്ടുകൾ ആണ് വരുന്നത്. ഏതായാലും പേട്ട കേരളത്തിൽ എത്തുന്നത് വമ്പൻ റിലീസ് ആയാവും എന്നുറപ്പാണ്. തല അജിത്തിന്റെ വിശ്വാസവും പേട്ടയുടെ ഒപ്പം തന്നെയാണ് റിലീസ് ചെയ്യുന്നത്.
