മെഗാ സ്റ്റാർ മമ്മൂട്ടി നായകനായ ഭീഷ്മ പർവ്വം തീയേറ്റർ റൺ അവസാനിപ്പിക്കുകയാണ്. സൂപ്പർ ഹിറ്റായി മാറിയ ഈ ചിത്രം ആഗോള ഗ്രോസ് ആയി എൺപതു കോടിയോളം ആണ് നേടിയത്. മലയാളത്തിലെ ഏറ്റവും വലിയ മൂന്നാമത്തെ ഹിറ്റായി ഈ ചിത്രം മാറി എന്നാണ് റിപ്പോർട്ടുകൾ സൂചിപ്പിക്കുന്നത്. അമൽ നീരദും നവാഗതനായ ദേവദത് ഷാജിയും ചേർന്ന് രചിച്ച ഈ ചിത്രം അമൽ നീരദ് പ്രൊഡക്ഷൻസിന്റെ ബാനറിൽ നിർമ്മിച്ച് സംവിധാനം ചെയ്തതും അമൽ നീരദ് ആണ്. ഇപ്പോഴിതാ ഈ ചിത്രത്തിന്റെ ഒടിടി സ്ട്രീമിങ് ഡേറ്റ് പുറത്തു വന്നിരിക്കുകയാണ്. ഏപ്രില്‍ ഒന്നിന് ഡിസ്‌നി പ്ലസ് ഹോട്ട് സ്റ്റാറിലൂടെയാണ് ചിത്രം സ്ട്രീം ചെയ്യുക. മൈക്കൽ എന്ന കഥാപാത്രമായാണ് മമ്മൂട്ടി ഈ ചിത്രത്തിൽ അഭിനയിച്ചത്.
ഫര്‍ഹാന്‍ ഫാസില്‍, ഷൈന്‍ ടോം ചാക്കോ, സൗബിന്‍ ഷാഹിര്‍, ശ്രീനാഥ് ഭാസി, ദിലീഷ് പോത്തന്‍, അബു സലിം, ലെന, ശ്രിന്ദ, ജിനു ജോസഫ്, വീണ നന്ദകുമാര്‍, അനസൂയ ഭരദ്വാജ്, നദിയ മൊയ്തു, മാല പാര്‍വ്വതി തുടങ്ങി വലിയ താരനിരയാണ് ഈ ചിത്രത്തിൽ പ്രത്യക്ഷപ്പെട്ടത്. സുഷിൻ ശ്യാം സംഗീതം ഒരുക്കിയ ഈ ചിത്രത്തിന് കാമറ ചലിപ്പിച്ചത് ആനന്ദ് സി ചന്ദ്രനും, എഡിറ്റ് ചെയ്തത് വിവേക് ഹര്ഷനും ആണ്. ഭീഷ്മ പർവ്വം കൂടാതെ മമ്മൂട്ടി നായകനായ പുഴു എന്ന ചിത്രവും ഏപ്രിലിൽ ഒടിടി റിലീസ് ആയി എത്തും. സോണി ലൈവിൽ എത്തുന്ന ഈ ചിത്രം മമ്മൂട്ടിയുടെ ആദ്യത്തെ നേരിട്ടുള്ള ഒടിടി റിലീസ് ആണ്. നവാഗതയായ രഥീന ആണ് ഈ ചിത്രം സംവിധാനം ചെയ്തത്.
